Nongpoh: Ka jingwan ther kynsan u Lapbah hynnin ka miet ha kito ki shnong kiba don ha khappud ka Meghalaya bad Assam, ka la wanrah shisha ia ka jingjulor kaba khraw ia ki katto katne tylli ki shnong kiba don ha katei ka thain bad kaba la wanrah ruh ia ka jingduhnoh haduh 4 ngut ki mynsiem briew.
Ka iing kaba la shah btep na ka jingtwa khyndew ha shnong 13Mer, Byrnihat
Ka jingtip kaba la ioh ban lum da u Nongthohkhubor, la iathuh ba katei ka jingwan ther kynsan u Lapbah ka la jia ha ka por 9:30 baje ei ei mynmiet, ha kaba ka jingther u Lapbah ka la pynshlei lut ia ki shnong ki thaw bad ki shnong kiba la shah ktah eh na utei u Lapbah ki kynthup ia ka shnong Tamulkuchi ha ki thain Byrnihat bad ka shnong Jerobad.
Haba halor ka jingshah ktah ka shnong 13Mer Tamulkuchi, la ioh ban iakren bad u Bah Aju Timung, uba dei Secretary shnong jong katei ka shnong, ha kaba kat kum ka jingiathuh jongu, la ong ba utei uLapbah u la sdang ban ther naduh ka por 9:30 mynmiet, hynrei hadien 15 minit ei ei u la sangeh noh. Pynban hadien katto katne por u la ther biang tad haduh ka por 12 baje ei mynstep bad dei ha kaba kum katei ka por ka la pynshlei ia ka shnong ka thaw bad wanrah ruh ia ka jingjulor kaba khraw ha katei ka shnong.
Nalor ba la shlei ka shnong ka thaw, la twa ruh sa ka khyndew bad na katei ka jingtwa ka khyndew ka la wanrah ia ka jingjia kaba sngewsih, ha kaba uwei na ki bar jylla uba la tip kyrteng kum u Dipak Demari, uba la wan bylla bad shongwai ha katei ka shnong, u la khlad noh namar ba u la shah btep ha ka khyndew bad ha kajuh ruh ka por ka la pynmynsaw ia arngut bad kaba kynthup ia ka Mela Boro bad ia ka khun jong ka kaba dang 4 snem ka rta.
“Ka shnong hi ka la shah ktah jur na ka jingwan kynsan u Lapbah bad kata ka long naduh ki lynti synkien kiba don ha shnong lem bad ki iing ki sem, namar katei ka um ka la rung lut ha ki iing ki sem bad ki dukan kiba don ha katei ka shnong” ong u Bah Aju Timung.
Haba ka um ka la rung hapoh ki iing ki sem, ka la ronglut ia ki tiar ki tar kiba don ha ki iing ki sem bad ia ki tiar kiba don ha ki dukan ruh kumjuh. Katkum ka jingiathuh da ki paidbah nongshong shnong la ong ba don ki iing kiba la shah rong noh ia ki Gas Cylinder, ki Tin umphniang bad wat ki sniang ki blang kiba la ri da ki nongshong shnong ki la shah rong ha katei ka um kaba la wan na ka jingther kynsan u slap, bynrap u Bah Aju Timung.