Shillong: Da ki spah tylli ki shnong kiba don ha ka thain Sepngi jong ka Dong Ri Bhoi, ki la hap ban shong dum khlem bording mynta la Lai miet kynthih, kata naduh ka miet sngi u Blei haduh bad kat haduh mynta ka bording kitei ki shnong kim pat ioh bording satia.
Katkum ka jingiathuh da ki katto katne ngut ki paidbah nongshong jong katei ka thain, ki la ong ba ka jinglip bording ha katei ka thain kam dei shuh ka sien kaba nyngkong, hynrei ki paidbah jong katei ka thain dangshen ki la mad ia kajuh hi ka apot bad khlem da tip ia ki daw hynrei ki la mad ia ka jingduh bording kaba laisngi kynthih bad kaba la wanrah jingeh shikatdei eh ia ki paidbah jong ki spah tylli ki shnong kiba don ha katei ka thain Ri Bhoi Sepngi.
Ki la iathuh ruh, ba katei ka jinglip bording, ka la ktah ia baroh ki shnong kiba don ha katei ka thain bad wat sha kito ki shnong kiba don ha khappud ka Meghalaya – Assam bad katno tam ha kaba kum kane ka por ba ka jylla ka don ia ka Ilekshon MP.
Haba iadei bad katei ka jinglip bording mynta la laisngi kynthih, na ka liang u Bah Centerwell Doloi, nongialam ka FKJGP ha Ri Bhoi Sepngi, u la ong ba ka seng hi kam lah khlem da pynrem jur halor kane ka jingbym shimkhia da ka tnat MeECL ban pynbiang ia ka bording, namar kumba ka long hi ki paidbah ki la ju iai mad ia kaba kum kane ka jingeh, tang namar ka jingbym shimkhia da ka tnat MeECL.
Haba iadei bad katei ka jingbym biang bording, u Bah Centerwell Doloi, u la kynnoh beit beit sha u EE ka MeECL, ha kaba u la ong ba katei ka daw baroh ka dei namar ka jingbym shimkhia jong u, namar katkum ka jingtip kaba ka seng ka la ioh jingtip na ki paidbah, la ong ba utei u EE ka MeECL, um ju shimkhia ban peit na ka bynta ban iaidbeit iaid ryntih ka bording, hynrei u kham bunkam ha ka ban peit ia ki kam lajong.
U la byrthen ruh da kaba ong, ba lada ka MeECL kam lah ban pynbiang ia ka bording ha katei ka thain, ka seng ha ryngkat bad ki paidbah kin sa pyni iala ka jong ka bor bad kata la ka long ban kyntait siew bai bording ne da kiwei pat ki lad.
Phi don ban ong eiei?