Shah ktah 12 tylli ki shnong & julor kumba 116 ïing sha Nongstoiñ

Nongstoiñ: Ka eriong kaba jur bha myn hynnin dang step ha kapor 6:30 eiei ka la wan ban syllad ia ka thaiñ Nongstoiñ ha kaba kiba bun ki ïing briew, ki skul, ki jingthung jingtep, ki dieng ki siej kila julor lut khait.

Katei ka eriong kala ioh ruh ban pynjulor haduh 12 tylli ki shnong kiba don ha ka thaiñ Nongstoiñ kiba kynthup ia ka Nongrangoi, Khliehmawlieh, Nongritong, Mawkawah, Pyndengrei, New Nongstoiñ, Siejlieh, Mawiong Lumsyntiew, Tiehsaw, Upper New Nongstoiñ, Nongdisong bad ka Mawrusyiar.
Nalor kitei ki shnong ka shnong kaba la kham jur bha ka jingjulor kadei ka shnong Tiehsaw ha kaba kiba bun ki ïing kila shah lied bad kumjuh ki post ding ilektrik ruh ki la khyllem lut bad ka skul KJP Synod Sepngi HSS ruh ka la julor haduh ba yn long shuh ban pynlong skul namar ka tnum ka la shah lied lut.
Shuh shuh katei ka eriong ka la kdiah ruh ia kiba bun ki dieng kseh kiba don ha ka thaiñ Pyndenglawar hajan ka Skul Donbosco Technical School Nongstoiñ bad ha ki katto katne ki bynta ka surok Nongstoiñ-Shillong kat haduh ba kala don ruh jingthut ha ka leit ka wan jong ki kali ha kapor mynstep.

Katkum ka kaiphod ba la ioh na u BDO ka Nongstoiñ Block, u bah C.P Mawkon, la ong ba ki la don baroh haduh kumba 116 tylli ki ïing kiba la julor na ka jingshah ktah ha ka eriong mynta ka step, hynrei donbok ba ym shymla don kano kano ka jingjia kaba sngewsih ne kiba mynsaw.