Shillong 24 Risaw: Halor ka jingshah khrong khajna beaiñ ia ki marrep jong ki nongrep ha ha khyrdop Mawshang, Ri Bhoi distrik ka ba hap hapoh ka jingpeit jong ka Khasi Hills Autonomous District Council (KHADC), na ka liang ki nongialam jong ka Hills Farmers Union (HFU) mynta ka sngi palei ka 24 tarik Risaw 2024 ka la leit ban iakynduh ia u EM ka Revenue u bah Alvin Sawkmie, ban iakren ha ka ba iadei bad kine ki mat kaba ka seng ka sngewkhia bha kaba iadei bad ka jingsiew khajna ki nongrep kiba shong ha katei ka khyrdop Mawshang, Ri Bhoi distrik.
Ha ka jingiakren bad ki lad pathai khubor u bah Alfondbirth Kharsyntiew uba dei u general secretary ka Hills Farmers Union u la ong, ba ka seng da ka jingsngewkhia ka la leit ban iakynduh ia u bah Alvin Sawkmie, halor ka jingsiew khajna kaba khlem da dei, kaba la pynngat ha ka jingkit ia ki mar rep lyngba katei ka jaka talasi, ha Mawshang, Ri Bhoi District.
“Ki mar rep kiba la pynmih ha ka jingkhein kyllum ki long kiba lait na ka khajna katkum ka ain, ka ba la kdew ruh ha ka bynta (10)1 ka ba ong “Baroh ki mar rep ki dei ban lait na kano kano ka jait khajna”,U la ong.
Ka jingshah khrong khajna ia ki marrep jong ki nongrep kam pynthut tang ia ka jingtreikam jong ngi, hynrei ka pynkiew ruh ia ka dor jong ki mar rep na ka bynta ki nongthied nongpet, la bynrap u bah Alfondbirth.
U bah Alfondbirth Kharsyntiew u la ong ruh, ba ym tang ba ka seng ka peit ha katei ka check gate hynrei ka kyrpad ruh ia ki nongrep ba la da don ki briew ki ba shimkabu ban khrong khajna na ki mar jong ki nongrep kin pyntip sha ki nongialam ka Hills Farmers Union.
Ha katei ka jingiakynduh, ka seng ka la pynpaw ka jingsngewkmen, ba na ka liang u bah Alvin u la kular ban shimkhia ia kane ka kam, da ka ba ong, ba lada kin dangdon ki briew ki ba shim khjna ia ki marrep jong ki nongrep kin sa pyntip beit sha ka Council khnang ban ioh ban weng ia ki jingeh jong ki nongrep.
Ka seng ka la buh ka jingkyrpad ia la Council ban tohkit ia kane ka kam bad ban pynthikna ba ym don kano kano ka khajna kaba be-ain ne kaba khlem akor ia ki mar rep.
Phi don ban ong eiei?