Shillong: U Chief Organising Secretary ka FKJGP Central Body uba dei ruh u President ka FKJGP Mawlai Circle u bah Marbud Dkhar, u la shah khot hajir ha ki pulit ba u dei ban wan mih hapoh Lumdiengjri Police Station namar ka jingjia kaba la jia ha them Metor ha ki shibnai tam mynshuwa. Katkum ka jingiathuh u bah Marbud u la ong ba la pynpoi shithi hajir sha u ha ka step sngi u blei bad ki pulit ki la hukum ba u dei ban wan mih hapdeng ka 16 haduh 18 tarik mynta u bnai bad la ong ba lada um leit mih kin leh katkum ki kyndon aiñ.
Ki dkhot ka fkjgp kiba ialum ha Lumdiengjri Police Station: Rupang
Myn hynnin ka sngi u bah Marbud u la leit sha Lumdiengjri PS ha ryngkat ka jingsynrang lang jong ki nongialam ba hakhmat ka FKJGP ba kynthup ia u bah Wellbirth Rani President, Dundee Khongsit General Secretary bad kiwei pat ki nongialam bad ki dkhot kiba poi kumba 40 ngut. Ha ka shith ikhot hajir la pyni ba la pynngat ia u bah Marbud ha ki 7 tylli ki kyndon aiñ kaba kdew katkum ka case No 63 (6) 2018 u/s 188/333/427/435/148/323/34 IPC. Haba la poi sha katei ka thanad Lumdiengjri ki pulit ki la shim jingkylli ia utei u nongialam ka FKJGP kumba katto katne por.
Hadien ba la mih na katei ka thanad bad haba ia kren bad ki nongthohkhubor, u President ka FKJGP u bah Wellbirth Rani, u la ong ba ka FKJGP ka dap da ka jinglyngngoh bad ka jingbitar haba iohi ba ka wan ka shithi khot hajir na ki pulit ia uwei na ki nongialam jong kate ika seng. U la ong ba ka kam them metor ka la jai jai mynta, hynrei ki pulit ki dang kwah ban khyllie biang bad haba ki khot hajir u la ong ba ka FKJGP ka la pan ia ki jingpynshisha halor ki jingkynnoh ia u bah Marbud ba u donkti ha ka jingiakhih them Metor.
“Ha ka jingiakhih them metor,ki Punjabi ki la rah da ka wait , ngi don ki jingpynshisha halor kane, la kynnoh ia u nongialam jong ngi hato ki pulit ki don jingpynshisha, ngi kwah ban tip la ka sorkar ka la kem ne-em ia kito ki briew kiba rah wait, lada ki lah shah kem ngi kwah ban iohi ba ka sorkar kan sei madan ia ki, ka sorkar ka la pyrshang ban khyllie tang ia ngi, ka mut ban leh shilliang katba ia ki khar Metor pat kam leh eiei” ong u bah Wellbith Rani.
Utei u nongialam ba hakhlieh duh ka FKJGP u la ong ruh ba ki pulit ki la kynnoh ba kiba mynsaw dei ki nongiakhih, “Ngi kwah ba kin pynshisha hato kiba mynsaw ki dei shisha kita ki nongiakhih, don bun kiba mynsaw ha ka jingiaid lynti, don bun ruh kiba mynsaw ha ka jingleit peitkai, ym don satia ka aiñ kaba khang ban leit peit kai, ka sorkar ka dei ban kem ia kito ki briew kiba wan sam tiar pynlip ding ha them metor, dei ban kem ruh ia kito ki briew kiba wan nabar ban mushlia naba dei kitei ki nongpynshit” ong biang u bah Wellbith.
U la ong ruh ba ha katei ka jingiakren bad u Investigation Officer (IO) ka FKJGP ka la kren shai ba nangne shakhmat ka kin ym treh shuh ban leit haba shah khot hajir ha ki pulit, “Ngi nangmut dur ba ka sorkar kan pynleit jingmut kumno ban pynkynriah ia ki khar metor pynban ki mut ban nion kylla ia ngi, nangne shakhmat ngi kren shai ba lada ki pulit ki khot hajir ngin ym leit, lada kin kem ai kin kem, ngin sa ia peit, ngim dei ki khawpud, ngin ia khih beit na bynta ka jaitbynriew, lada ka dang iai jia kumne ngin ym treh ia kren shuh ruh bad ka sorkar” ong u bah President ka FKJGP.
U General Secretary katei ka seng u bah Dundee Khongsit pat u la ong ba ka sorkar ka la pyrshang ban pynngat kyndon ia ki nongialam sengbhalang da kaba khot hajir katno tam lei ia ki riew paidbah, u la kyntu ia ki paidbah ba nangne shakhmat kim dei ban tieng lada ki pulit kin khot hajir, “Ki paidbah kim dei ban tieng lada ki pulit ki khot hajir, ngim dei ban tieng ha ri lajong, ki paidbah kim dei ban tieng ban smiej” u la ong.
U bah Marbud pat u la ong ba la pynngat ia u ha ki kyndon ba u shoh briew, u pynthud ia ki nongtrei sorkar kiba don ha ka kam bad ba u donkti ruh ha ka jingiakhih them metor. U la ong ba u la iathuh sha ki pulit kiba khot hajir ba ha katei ka jingiakhih ha Motphran ki don da ki phew hajar ngut ki paidbah bad kum u nongialam sengbhalang ruh um lah ban shu thiah khop ha ing haba don kum kitei ki jingjia bad um lah ban shu sngap mynthi bad u la leit sha katei ka jaka.
“Kum uwei na ki nongialam sengbhalang ngam lah ban shu thiah khop ha ing ne ban shu sngap mynthi, ngam dei u Hijra ban shu shong ha ing, haba mih ki khubor hamsaia ba la don ba iap briew nga leit sha katei ka jaka ban pyntikna la ka dei shisha ne-em, ngi leit sha ki Hospital ban leit peit ia kiba mynsaw, ki la ong ia nga ba nga post ha Facebook ba nga kynnoh ba siat ki pulit ba mynsaw ki briew, ngan ong kumno haba ka dei ka jingshisha ba ki don kiba mynsaw naba shah siat ha ki pulit” u la ong.”Ngi pynpaw ka jingbitar balei la ngi la khot hajir, katba ia ki khar Punjabi hato ki la shah khot hajir, hato ki la shah kem, ki briew kiba wan nabar hato ki shah khot hajir” ong u bah Marbud Skhar Chief Organising Secretary ka FKJGP.