Nongpoh: Ha ka sngi kaba u Samla Lester Nong bet, General Secretary ka KSU Umsning Circle, u la shah khot hajir hakhmat ki Pulit ka Umsning Police Outpost, ki nongialam ka KSU, North Khasi Hills District, ha ryngkat ki nongkitkam na ki Circle bad Unit bapher bapher, ki la leit ban synran ia u ha ka por ba u leit sha katei ka thanad kaba don ha Umsning.
Ki nongialam ka KSU, kiba la leit ban synran ia utei uba la shah khot hajir, ki kynthup ia u Samla Ferdynald K Kharkamni kum u President, Bah Lambok Rymbai, Secretary lem bad kiwei pat ki heh nongialam ka KSU ha Ri Bhoi.
Hadien ba la mih na katei ka thanad, u Samla Ferdynald Kharkamni, u la ong ba ka seng ka sngewkhia eh halor katei ka jingshah khot hajir u dkhot ka Seng, namar kum ka seng ha kaba kum kane ka por ka iatreilang bad ka sorkar, na ka bynta ban khanglad ia ka jingsaphriang u khning jingpang COVID-19.
“Kum ka seng ngi sngewsih ban iohi ba ki dkhot kiba trei shitrhem na bynta ban peit ia ka rung ka mih ki briew kiba nabar, hynrei ki shah khot hajir pynban ha ki Pulit” ong u Samla Ferdynald Kharkamni.
Namarkata, haba iadei bad katei ka jingshah khot hajir u dkhot ka seng, na ka liang ka seng ka pynmih syndon da ka sur kaba tyngeh pyrshah ia ka sorkar jylla bad khamtam ia ki bor pulit, ba nangne shakhmat kin nym treh shuh ban iatreilang, na ka bynta ban wanrah ia ka shongsuk shongshngain hapoh ka jylla hi baroh kawei.
Watla ki dkhot ka seng, ki shah khot hajir ha ki pulit tang namar ba ki trei bha na bynta ka jaidbynriew, namarkata ka seng kan trei noh ia ka jong ka lynti bad kata ka long ba kan nangpynjur ia ki kam khynra ia ki bar jylla bad khamtam ia kito kiba wan na kiwei ki jaka, kumta lada jia ei ei ka jingbahkhlieh kan leit sha ka sorkar, byrthen tyngeh utei u nongialam ka KSU ha Ri Bhoi.
Kum ban shu kdew hangne, ba ka nongrim kaba la pynlong ia utei u nongialam ka KSU Umsning circle ba un shah khot hajir hakhmat ki Pulit, ka dei halor ka nongrim ba ki la bat ia kawei ka bus Traveller kaba la kit kumba 16 ngut ki bar jylla, kiba la wan na UP bad kiba thmu ban leit sha Silchar.
Halor katei ka jingjia bad katkum ka jingiathuh da ki nongialam ka KSU, la ong ba ki dkhot ka KSU, ki la lap ba katei ka bus ka la pynieng hapoh kawei ka petrol pump kaba don ha Umran ha ka por 11 baje ei ei mynmiet bad ha katei ka por ba la lap da ki dkhot ka KSU, kitei ki bar jylla kiba shong ha katei ka Bus, ki la mih shabar bad don ruh napdeng jong ki, kiba la iaid sharum shaneng bad kiba la mut ban thiah ha katei ka jaka.
Phi don ban ong eiei?