Shah khang lynti ki CoRP, ban leit rah plakad ha ophis MeECL Umiam

Nongpoh:Ka jingthmu ki nongialam bad dkhot ka Confederation of Ri Bhoi People (CoRP) ha ryngkat ki paidbah ban leit rah plakad bad lama iong ha phyllaw treikam ka ophis MeCCL Umiam kaba myn hynnin ka sngi, ka la pulom noh, kata hadien ba ki la shah khanglad noh ha ki Magistrate bad pulit ka Umiam Police Station.

Ka khana halor kane ka sngi, ka long ba ki la don ki nongialam bad dkhot ka CoRP lem bad ki katto katne ngut ki paidbah, ha kaba ki la pynbiang lypa ia ki Plakad bad lama iong, da ka jingthmu ban leit rah ha ophis MeECL Umiam, hynrei ha kaba kum katei ka por, la wan mih noh ki Magistrate na Ri Bhoi bad Pulit Umiam, kiba la lah ban khanglad noh ia kitei ki nongiakhih bad ha kaba kum katei ka por, ki la shu khot noh da ka jingiakren tang ia ki katto katne ngut ki nongialam na katei ka kynhun khih pyrshah.

Lah ruh ban kdew hangne, ba ka nongrim kaba la pynbitar ia ki nongialam ka CoRP bad kiba la shim syndon da katei ka sienjam ban leit iakhih ha ophis MeECL Umiam, ka dei hadien ba ki la ioh shibun ki jingujor na ki paidbah, halor ki kam leh thurmur da ki nongtrei ka MeECL, kata ka long naduh ka rukom pynpoi ia ki Bill Light, ka jingkiew kaba kynsan kynsan ka bai bording lem bad shibun kiwei pat ki daw.

Halor katei ka jingiakhih pyrshah ia ka MeECL, u Bah Bandary Ryntathiang, President ka CoRP, u la ong ba katei ka jingiakhih ka seng ka dei kaba jai jai, ha kaba watla ki la shah pakhang lynti noh ha ki Magistrate bad Pulit, kum ka seng kam sngew eiei ruh em, hynrei lada ka MeECL ka iai bteng ia ki kam thurmur, ka seng kam banse ban shim da kiwei pat ki lynti kiba kham tyngeh.
U la ong ruh, ba ka seng kam lah ban shu shongkli kti haba ka la ioh ia shibun ki jingujor na ki paidbah nongpyndomkam bording, kiba la ujor sha ka seng na ka por sha ka por, kata ka long naduh haba iadei bad ka jingtorti ha ka rukom pynpoi ia ki bai bording, ka jingkiew ha ka bai bording bad khamtam eh ia kito ki longiing kiba duna ka pyndonkam bording, pynban ka bai bording pat ka kiew katba nangmih ki sngi bad kaba la pynshem jingeh wat ia ki nongpyndonkam bording ban siew ia ka.

Hadien katei ka jingiakhih ki CoRP lem bad kiwei, ka la don ka jingshah khot iakren na bynta ki nongialam ha katei ka jingiakhih, hynrei ka seng ka ieng beit ha kajuh ka nongrim bad kata ka long ban pynbeit noh ia ki kam ba kynriang ha MeECL, namar lada ym lah ban pynbeit, kan sa wanrah ia ki nongpyndonkam bording bad khamtam eh ia kito ki longiing baduk, bynrap u Bah Bandary Ryntathiang.

Kane kan dei tang ka sienjam jingiakhih kaba sdang bad kaba jai jai kaba ka seng ka mih madan ban pyrshah halor ki kam thurmur ka MeECL, hynrei lada ka MeECL kam lah ban pynbeit noh mardor, ka seng kam banse ban shim da kiwei pat ki lad ki lynti kiba kham tyngeh, u la bynrap.