Ka eriong Michaung, ka la pynjulor thiaw ia ka nongbah Chennai, na ka jingther jubor u slap, ha ki khyndiat sngi ba ladep. Ka nongbah Chennai, ka don mynta, ha ka jingsangeh lut jong baroh ki kam ki duk, ha kine ki ar sngi ba ladep.
La iathuh ruh, ba u aktor Vishnu Vishal, ula sahkut ialade ha ka jingshlei um ha Karapakkam bad u pyntip, ba ula lait im, na ka jingiarap lem jong ka fire and rescue department. Ha katei ka dur, la iohi ruh, ba u don lang U Aamir Khan, uba la shah ker kut ha ka jingshlei um, ha katei kajuh ka jaka.
U Vishal, u iathuh, ba ula shah kerkut ha ka jingshlei um ha Karapakkam. Nangta, u ong shuh shuh “Ka um, ka la rung ha ka iing sah jongnga bad ka nang kiew wut shi wut shajrong. Nga la pan jingiarap, na ki bor pulit. Ym don ding ilektrik, ym don wifi ruh. Ym don phone, ym don signal bad nga khmih lynti, ba manga lem bad kiwei, kiba don hangne, kin ioh jingiarap kyrkieh”.
U Aamir, u don ha Chennai, namar ka jingshah sumar ka kmie jongu, ka Zeenat Hussain, naduh u bnai risaw ba ladep bad ka kmie jongu, ka shah sumar, ha kawei ka hospital ha Chennai bad kumta, U Aamir, u kwah ba un don ha syndah jong ka kmie jongu, ha ka por, ba kam don ha ka met kaba koit ba khiah.
Phi don ban ong eiei?