Shah kem uwei na ka jinghuri hura, rali Rangbah Shnong

Shillong, 19 Naiwieng:
Ki pulit ka nongbah ki la ioh kem uwei u samla halor ka jingkynnoh ba donkti ban ther maw ha ka jingiaid paidbah jong ki rangbah shnong hapoh ka lama ka Synjuk Ki Nongsynshar Shnong Ka Bri u Hynniewtrep (SNSBH) kaba la long ha ka 5 tarik Naiwieng.
Une u samla ba shah kem la tip kyrteng kum u George Rynjah ba 20 snem ba sah ha Law sohtun Block-2. La kem ia une u samla ha ka 18 tarik Naiwieng, la ong u SP ka East Khasi Hills u Bah Mariahom Kharkrang haba iakren mynta ka sngi Palei.
Ha ka jingleit kem jong ki pulit ia une u samla, u SP u la ong ba don ki longkmie ba thmu ban khang lad hynrei ki dei ban tip ba ka jingthmu ban khang lad ka dei ka kam beain bad ki lah ban shah pynngat ha ka kyndon Indian Penal Code (IPC) bad ki pulit kin nym map ban ujor pyrshah ia ki sha ka ain.
U la ong ba ki pulit ki dang thmu ban leit kem shuh shuh ia kito kiba donkti ha ka jingther mar tangba ki don kiba la phet rieh noh tang shu leit ki pulit.
Lah ban kdew ba ka jingiaid paidbah jong ki rangbah shnong ha katei ka sngi ka la mih ka jinghuri hura hadien ba la mih ka jingther maw sha ki pulit da ki paidbah kaba la pynlong ia ka jingjulor jong ki kali bad ka jingmynsaw jong ki pulit.
Ki pulit ki la kam ba ki don kumba 20 ngut ki samla kiba la shongshit kiba la leh ia kam ban ther maw ha katei ka sngi bad ki la pynmih kyrteng ruh ba ki dei ki dkhot jong ki seng bhalang.