Nongstoiñ: Wat la ki pulit ka Nongstoiñ, ki la ioh ban kem noh ia shi bun ngut ki snar nongkhaii drok hapoh ka sor Nongstoiñ, hynrei ka jingiaid buddien jong ki pulit ban thwet shuh shuh sa ia kiwei pat kiba kham snar bad kiba kham shyrkhei shuh shuh ban khaii ia u tei u jingdih pynbuaid kala iai bteng beit khlem shong thait.
Li-drok-bala-ioh-kurup-da-ki-pulit-na-u-snar-nongkhaii-drok:Rupang
Katkum ka tyllong khubor ba la ioh lum na ki heh pulit jong ka West Khasi Hills District, la ong ba hynnin ka sngi ka 18 tarik u Naitung ki pulit ka Nongstoiñ, ki la ioh ia ka jingtip kaba tikna halor ka iaid ka ieng jong u wei u briew u ba ki pulit ki la suba jur ba u dei u wei na ki snar nongkhaii drok u ba na Nongstoiñ ha kaba na ka liang jong ki pulit ruh ki la pynlong ia ka jingpynap shrip bha ia u tei u briew.
Shuh shuh ka tyllong khubor na ki heh pulit, ka iathuh ruh ba na ka liang jong ki pulit ka Nongstoiñ, ki la ioh ia ka jingtip ba u tei u briew u bala tip kyrteng kum u Jeffrey Lyngdoh u ba na ka shnong Mawiong Lumsyntiew Nongstoiñ, u la mih na Nongstoiñ da ka jingthmu ban leit sha Shillong ban leit thied drok na Madanriting ban ioh wan khaii sha Nongstoiñ.
Ka khubor ka iathuh ruh ba u tei uba la suba nongkhaii drok u la leit sha Shillong da kaba u shu wai (reserve) ia kawei ka kali kamai kaba don ia u number ML 06 6567 ia kaba la niah da u Miketining Sohphoh bad na ka liang jong ki pulit ka Nongstoiñ ha ryngkat ka jingiatreilang bad ki pulit ka Mairang lyngba ka jingioh jingbit ruh na u bah G.D Kharwanlang Superintendent of Police West Khasi Hills, ki la pynlong ia ka jingpynap shrip ha Lumsohkhlur Mairang.
Katba ki pulit ki dang pynlong ia ka jingkhynra ia ki kali ha kapor kumba 8:00 PM ei ei la wan poi katei ka kali ba ki pulit ki la ioh jingtip bad na ka liang jong ki pulit ruh ki la pynsangeh ia katei ka kali ha kaba ki la lap shisha ba u tei uba la suba nongkhaii drok u la don hapoh jong katei ka kali. Kumta na ka liang jong ki pulit ki la pynlong ia ka jingtalasi ia katei ka kali bad kumjuh ia kitei ki ar ngut ha kaba ki pulit ki la ioh ruh ban kurup ia shibun bah ki drok na ka met jong u tei u suba nongkhaii.
Hadien ba ki pulit ki la dep ban pynlong ia ki jingbishar bniah lyngba ki jingtest drok ki la pyntikna ba u drok ba la ioh kurup na u tei u snar nongkhaii u dei u Heroin u ba ka jingkhia ka jong u ka la kot shaduh ka 24.95 gram bad na ka liang jong ki pulit ki la leh bad pyndep ia baroh ki jingdonkam katkum ka ain NDPS Act ha ryngkat ka jingiadonlang U Bah HP Kharkongor MPS, SDPO Mairang lem bad ki nongsakhi.
Na ka liang jong ki pulit ki la register ruh ia ka case ha Mairang Police station katkum ka case number 16(07)2018 u/s 21(b)/27 NDPS Act bad ka jingtohkit halor katei kan dang iaid shakhmat, katba ha kaba iadei bad u nongniah jong katei ka kali kamai ha ka jingtohkit jong ki pulit u la iathuh ba um don jingtip ei ei ruh em halor ka jingdon drok ha ka met jong u tei u snar nongkhaii namar ba u tei u snar khaii drok u la shu wai ia ka kali ka jong u da kaba u tei u snar khaii drok u la ai daw ba un shu leit shim dawai na ka bynta ia lade bad kumjuh na ka bynta ka lok jong u.