Shah kem u snar ka GNLA

Shillong,23 Naitung:
Hadien ka jing thwet kaba jur kaba da ki snem tam, mynta ka sngi ki pulit ka jylla ki la ioh ban kem ia u snar jong ka Garo National Liberation Army, GNLA u Signal Ch. Sangma, la kem ia u Sangma na ka shnong Rangdapara kaba don marjan bad ka Gambegre,West Garo hills. U Sangma u dei uwei na ki dkhot ka GNLA uba ki pulit ki thwet jur la kham slem hynrei mynta ka sngi la ioh kem ia u ha ka por 4:30 baje janmiet.
U Signal Ch Sang ma u dei uwei na ki dkhot ka GNLA uba la donkti ha ka jingthom bor ia u myntri sorkar barirm u Saleng Sangma ha u kyllanglyngkot jong u snem ba la dep. Ha katei ka por ba ka GNLA ka la thombor ia u Saleng, ki la donlang ruh sa uwei pat u dkhot ka GNLA uba la tip kyrteng kum u Hadeo Momin uba ki ju khot sin u Karak. Ha katei ka por, kitei ki ar ngut ki GNLA ki la pynap da u bom IED ha ka lynti ban leit sha ki thain ka Marap gre kaba hap hapoh ka Block Gambegre, kaba dei ka lynti ka u Saleng Sangma u dei ban iaid lyngba ha katei ka sngi .
U SP ka West Ga ro hills u SP Singh haba kren sha ki lad khubor u la iathuh ba dei hadien ba ki pulit ki la ioh jingtip na ki bor syntiat ba u Signal u don ha katei ka jaka , mar-mar ki pulit ki la leit ban khang kdong bad dei ha ka por janmiet ba ki la ioh ban kem ia u. Ia u Signal ki pulit kin leit rah sha kashari lashai ka sngi ban pan bor ban tohkit ia u. U Signal bad u Hadeo ki dei ki arngut ki GNLA kiba ka jingthwet ki pulit ia ki kalong kumba thwet ia u Sohan D Shira.
Ha kawei pat ka khubor, u dkhot ka GNLA uba la tip kyrteng kum u Jakra N Sangma, uba la shah kem ha ka sngi hat majai na Asanang , ka shnong kaba jngai kumba 18 kilomitar na Tura la leit mynta ka sngi sha ka District Session Court , ha kaba la ai bor ia ki pulit ban tohkit ia u haduh 7 sngi kynthih. U Jakra u dei uba ju donkti ha ka kam dawa pisa ha ka kyrteng u Baichung Momin u Area Commander ka GNLA, u dei uba ju dawa pisa na ki thain ka Tura bad ki pulit ki la ioh kurup haduh T.1,23,000 hajar tyngka na u.