Shah kem u shipai ka ANLCA na Songsak

Shillong, 26 Rymphang:
U shipai comman der-in-chief ka seng lehnoh thymmai ka Achik National Liberation Central Army (ANLCA) bad u nongbud jongu ki la shah kem ha ki pulit bad ki tiar ialeh na kawei ka shnong ha Songsak ha East Garo Hills district ha ka step sngi Balang.
U C-in-C, la tip kum u Sengpan Marak na Pakkregre, ha Rongjeng bad u Grewingston Marak na Chisim Matchokgre, haNorth Garo hills district.
Kine ki ar ngut ki dkhot ka ANLCA ki la shah kem ha ka por ba ki dang iaid lynti da ka sumo ha ki pulit SWAT commando kiba pynlong ia ka jingiaid pahara ha katei ka shnong Songsak, la ong u SP ka district u JFK Marak.
U Marak u la ong ba kine ki ar ngut ki la shah kem na ka Sumo bad la ioh kurup 7.65mm pistol lem bad ki synduk thep kuli bad ki kuli 35 round na u Grewingston Marak, bad ki song ba don 68 tylli ki kuli ka 7.62 AK- rifle na u Sengpan Marak.
Ki pulit ki la ioh kurup ruh ia ka AK-47 rifle bad ka synduk thep kuli na ki, la ong u SP.
Ha ka jingtohkit ki pulit, u Sengpan Marak u la iathuh ba u dei u Commander in Chief katei ka seng uba donkti ban rahbor ia u Nokma na shnong Songsak Bonegre ha ka 23 tarik Kyllalyngkot.
U Sengpan u donkti ruh ha ki kam pyniap bad ki kam lute bad rahbor ha ka thain Songsak bad Rongjeng ha East Garo Hills bad ha Dainadubi, Bajengdoba ka North Garo Hills District, la ong ki pulit.