Shah kem u SDSEO ba dawa pisa na u nonghikai

Shillong,17 Nailur:
Ki pulit ka tnad CID bad Shillong Special Cell ba la ialam da u Inspector P.Suchen, myn ta ka janmiet jong ka sngi balang ki la pynap shrip bad ki la ioh ban kem pyllen pyllein ia u Sub Divisional School Education Officer u Lutfer Rahman na ophis trei kam jong u na Mairang, West Khasi Hills.
Ka Spl Superiten dent of Police, CID ka kong CA Lyngwa , MPS ka la iathuh ba utei u SDSEO u la dawa pisa haduh T.30 hajar tyngka na u wei u nonghikai uba la tip kyrteng kum u DMI Mawnai , bad katei ka jingdawa pisa ka long ban ai ia ka syrnod pynkynriah kam ia u na Nongthymmai Goverment LP School sha Nongbah Bynther Goverment LP School. Ka SP Lyngwa ka la iathuh ba katkum ka jingtohkit utei u SDSEO u dei uba mlien ban leh ia kum kitei ki kam bad u ju dawa pisa na ki nonghikai ha kaba ia dei bad ki rukom treikam.