Shah kem u President ka HANM, kynnoh ki pulit ba u iarap HNLC

Shillong,4 Jymmang:
Ha ka sngi thoh dieng jong ka taiew ba la dep, ki pulit SWAT ki la kem ia u President ka HANM u bah Lamphrang Kharbani, halor ka jing kynnoh ba u dei uwei na ki nongiarap ban pynioh pisa bad ban pynbit pyn biang ia ka jingdonkam ka HNLC. Ia u bah Kharbani ki pulit ki la kem na ka shnong Rangthong, South West Khasi hills katba u dang thmu ban wan phai sha Shillong. Ryngkat bad u bah Kharbani ki pulit ki la kem ruh ia saw ngut kiwei pat halor katei ka juh ka jingkynnoh.
Ka tyllong khubor ba la iohlum na ki pulit la iathuh ba shuwa ban kem ia u, ki pulit ki la buddien bha ia ka iaid ka ieng utei u nongialam ka HANM, ‘ Ngi don ki bor syntiat kiba biang, kiba la pynthikna ba dang ha kine ki sngi u bah Lamphrang Kharbani u la leit sha Bangladesh ban ia kynduh ia ki nongialam ba hakhmat ka HNLC’ ong ki heh pulit. Ki pulit ki la kam ruh ba uwei na ki ba shah kem udei u dkhot barim ka HNLC.
Baroh kiba shah kem la leit rah sha ka Ingbishar ha kane ka sngi saitjain ba la dep, ha kaba ka Ing bishar ka la ai bor ia ki pulit ban tohkit haduh 5 sngi ia u nongialam ka HANM bad kiwei pat kiba la shah kem. ‘Baroh kiba la shah kem ki dei kiba don ka jingiadei ba jan bad ka HNLC, ngi la ioh ruh ban kurup ia ki shithi dawa pisa ka HNLC na ki’ iathuh ki bor pulit. Hadien ba la shah kem ka khubor pulit ka la iathuh ba ia u bah Kharbani ryngkat kiwei pat kiba la shah kem la buh ha Mawkyrwat PS hynrei la thmu ban pynkit noh sha Shillong mynta ka sngi u blei.
Lah ban pynkyngmaw ba kane ka dei ka sien kaba lai ba u President ka HANM u la shah kem, kham mynshuwa la kem ia u halor ki jingkynnoh ba u la donkti ha ki kam khaii tiar siat, u dei ruh u kyrtong shimet uba la iakhun ha kane ka elekshon MDC ba dang shu dep na Langrin Konstitwensi.