Shah kem u nongshna suloi na pud Assam

Shillong, 9 ’lyngkot:
Uwei u nongshna suloi na shnong Khardang markhap bad ka Assam ha Garo Hills, u la shah kem mynta ka sngi, halor ka jingshna suloi beain jongu.
Ki pulit ki la kem ia u Trulson Ch Marak (51) lem bad kawei ka suloi rifle lem bad 6 tylli ki synduk thep kuli bad 11 tylli ki paip nar ba thmu ban shna suloi na iing jongu ha Khardang.
Kham hadien la rah ia u sha ka Bajengdoba police station.
Ha kawei ka liang, ki pulit ki la ioh jingtip ba ki don ki dkhot ka Garo National Liberation Army (GNLA) kiba leit byrngem ia ki paidbah ba ki dei ban thep pisa ha ka bank account jongki bad kane ka la jia ha ki bynta jong ka North Garo Hills, hadien ba la shah ktah na ka jingpynduh iaki lut tyngka 500 bad 1000.
Halor kane, ki pulit ki dang pynlong ia ka jingtohkit bniah ban lap la ka don shisha ne em kum kane ka jingbyrngem na ki dkhot kynhun runar.
Ki pulit ki la kam ba ka GNLA ka la sdang ban thaw lad ban pynrung dkhot thymmai khamtam hadien ba la leit pyndem wait bun kiba hakhmat ka seng kaba la buh jingeh shibun ia ki.