Shah kem u nongkhaii drok na Mawlai

Shillong, 7 Naiwieng:
Ka tnad Anti Narcotics Task Force (ANTF) ki pulit ka East Khasi Hills ki la ioh kem ia uwei u nongkhaii drok uba la tip kyrteng kum Wankmen Susngi, 27 snem karta na Mawlai Nongpdeng katba u dang die ia u drok Heroin, la kem ia u da ka jingiarap jong ka Dorbar Shnong Mawlai Nongpdeng. Ki pulit ki la ioh kurup 6 song ki drok ba la kyllain ha kot kiba don ka jingkhia kaba 0.16gram, la ioh kurup ar tylli ki mobile phone.
Da ka jingialam jong u ki pulit ki la pynap shrip ban ioh kem sa ia ki paralok jong u, ki pulit ki la ioh kem ia u Hmar Ramengmawia,  28 snem na Madanriting  la kem ia u na iew Madanrting.
Hadien la ioh kem sa ia u Shokhomang Lhungdim, 40 snem karta uba dei ruh u nongkhaii drok ba satar bha uba shong basah ha Lumbatngen, Law-u-Sib, Shillong bad na utei la ioh kurup 127.77 gms ki drok heroin kiba shongdor T.12,77,700 tyngka (Khadarlak hynniewphew hynniew hajar hynniew spah tyngka).
Baroh ki pulit ki la ioh kurup 385 tylli ki tyndong tin duma golden, 2 tylli ki mobile phones, ki kot ki sla bad 7 tylli ki song heh jong u drok heroin.
Ki pulit ki la iaroh ia ka Dorbar Shnong Mawlai Nongpdeng bad kumjuh ki Seng Samla kiba la snohkti lang ban ioh kem ia kitei ki nongkhaii drok.