Shah kem u nongdie drug ha Jowai

Jowai, 24 Jylliew:
Ki pulit ka WJH mynta ka janmiet ha ka por kumba 7:30 pm ki la ioh ban kem ia uwei u briew uba die drug hangne ha Nongbah Jowai.
Ka jingiohkem ia utei u briew ka long hadien ba ki pulit ki la ioh ia ka jingtip sop sop shaphang ka jingdonkti jong u ban khaii bad dih drugs hangne ha ka Nongbah.
Utei u briew udei uba la tip kyrteng kum u Romeo Synrem uba shong basah ha Khimusniang, Jowai bad uba dei ruh u driver local Taxi.
Ha katei ka por ba u sah kem u la wan da ka taxi kaba don u Nombor ML04A 0931 kaba dei trai da u ma Donboklang Wann na Shangpung.
Ki pulit ki la ioh kurup ruh ia u drug heroin uba khia haduh 4 grams nalor ki tyndong thylli kiba ju pyndonkam ban thep drugs. Utei u briew udei uba la ju shah kem teng ha kum kine ki kam bad na kata ka daw ki pulit ki lah ban register case pyrshah ia u.