Shah kem u kpa bad ka kmie, kiba bret khyllung ha Mawpat

Shillong:Kawei ka khynnah kaba dang samla lud ryngkat bad uwei u samla shynrang, ki la shah kem halor ka jingbret ïa i khunlung ba dang shu kha ha ka trok bret ñuit ha Mawpat, Shillong.

Ïa ka metïap jong itei i khunlung la lap na kawei ka trok kit ñiut ha ka sngi Ba-ar, hynrei hapdeng jong ka jingtohkit, la kem noh ïa ka kmie bad ïa u kpa jong itei i khunlung ha ka sngi Balang.

Ka kmie jong itei i khunlung ka dei kaba dang don hapoh jong ka 18 snem ka rta bad ki shong bad sah wai ha kawei ka ïing ha Mawpat, katba u kpa jong itei i khunlung udei na ka shnong Rymbai, hynrei u shu wan trei wan ktah ha Mawpat.
Hadien ka khubor jong ka jinglap ïa i khunlung ba dang shu kha ka la saphriang, ka kmie jong ine i khunlung da ka jingsngewsih bad jingsngewthuh ïa ka jingleh bakla ka jong ka, ka la leit ban phla ha ki Trai ïing, ha kaba ki la pyntip kylla sha ka Dorbar Shnong.

Ka Dorbar Shnong ryngkat bad u Rangbah Shnong, kila aiti noh ïa kitei ki ar ngut sha ki pulit ba kin pynlong ïa ka jingtohkit.