Shah kem u khun jong U Shahrukh Khan, na ka jaka khawai dih droks

U Aaryan Khan, uba dei u khun jong U Shahrukh Khan, ula shah kem hynnin ka sngi, ha ki pulit Narcotics Control Bureau (NCB) bad nalor jongu, la kem lang sa 7ngut kiwei pat, ba kynthup ia arngut ki kynthei, na kawei ka jhad bad katei ka dei halor ka jingthmu ban ia dih droks ha katei ka jhad, ong ka khubor.

Kiba shah kem, nalor U Aaryan Khan, ki kynthup ia ka Munmun Dhamecha, ka Nupur Sarika, U Ismeet Singh, U Mohak Jaswal, U Vikrant Chhoker, U Gomit Chopra bad U Arbaaz Merchant. La ioh kurup ruh ia ki droks, kiba kynthup ia ka MDMA, ecstasy, cocaine, MD (mephedrone) bad charas, ha katei ka jingleit talasi hynnin ka janmiet.

Ki pulit NCB, ki leit talasi ia katei ka jhad, hadien ba ki ioh khubor, ba ka don ka jingthmu ban ia khawai dih droks, ha katei ka jhad, ha ka janmiet sngi saitjain bad kumta, ki la leit khynra ia katei ka jhad, ha kaba ki la lap ia kitei ki briew lem bad ki droks bapher na ka jhad. La iathuh ba la lap ia kitei ki tiar, ba la buhrieh bha, ha ki jain, ki sopti poh bad ki pla jong kitei ki arngut ki kynthei.