Shah kem u khar tuh ha Dawki

Shillong, 12 Nailar:
Ka jingioh rung laitlan ki briew na ka ri Bangladesh hapoh u pud u sam ka India ha ki thain Dawki ka la pynmih ia kiba bunjait ki jingjia kiba pyni ia ka jingtlot treikam ki shipai BSF kiba don ha katei ka thain.
Mynta ka step ha ka por 8 baje eiei ka la don ka jingshah tuh na ka kali kit khubor jong u Rupang. Katei ka jingjia ka la jia katba u nongniah kali u dang leit sum sha wah Umngot bad ia ka kali u la pynieng ha surok bah kaba don markhap bad ka jaka ba don ki shipai BSF.
Ha katei ka por ki la don ki riew paidbah jong ka shnong Dawki kiba la iohi ba don ar ngut ki nongtuh kiba dang leit jynrat ia ka iit kali jong katei ka kali kit khubor bad ha katei ka por kitei ki briew ki laleit ban beh ia kitei ki ar ngut ki nongtuh, hynrei uwei na ki u la lait phet.
Hadien ba la ioh bat ia utei u wei pat, ki briew ka shnong Dawki ki la leit rah sha u Rangbah Shnong bad hadien kata u Rangbah Shnong u la ujor, sha ki pulit ka thanad Dawki. Utei u nongtuh uba la shah kem u dei uba la tip kyrteng kum u Anwar Ali na ka Shnong Pasol, Bangladesh kaba hap hapoh ka Jaintiapur Police Station bad uwei pat u paralok jong u uba la lait phet u dei uba la tip kyrteng kum u Manwar Ali uba dei u nongniah Trok ha Bangladesh.
Ia u Anwar Ali la wan ban shimti da ki pulit ka Dawki PS bad mynta u dang don ha kti ki pulit bad ka jingtohkit ka dang iaid shakhmat. Katei ka jingshlur jong ki khar Bangladesh ban tur shapoh u pud u sam ka India ka la pynlong ia ki paidbah katei ka thain ban duh jingshaniah ia ki shipai BSF naba ki la ong ba lymda dei ba bat ki briew jong ka shnong ia kitei ki khar Bangla , ki shipai BSF kin ym tip eiei ruh kata ruh ka dei ka jingjia hajan ka jaka ba ki don duty.
Ha kawei pat ka khubor, mynhynin ka miet ki la don ar tylli ki lieng kiba la shah tuh na ka Wah Dawki (umngot) bad kawei na ki lieng ka dei ka jong uwei u rangbah ban a ka shnong Bakur, Dawki bad kawei pat na Dawki. Kitei ki lieng kiba la shah tuh ki dei kiba la pynieng marsyndahbad ka iingsah jong ki nongniah lieng ki shipai BSF, bad ka jaka ba la buh ia ki lieng ba la shah tuh ruh ka dei ha trai jong ka kynroh ba don ki shipai BSF. Hangne ruh ki paidbah ka Dawki ki la kynnoh ba kitei ki jingjia baroh ki la mih na ka daw ka jingbym ler treikam ki shipai BSF kiba don ha katei ka thain.