Shah kem u Khar Bangla na Khyndai Lad bad ka pisa T.2 lak

Shillong,
21 Jylliew:
Uwei u khar Bangladesh u la shah kem hynnin ha ki pulit ka nongbah na Khyndai Lad bad ka pisa Bangla kaba T. 2.70 lak.
Une u khar Bangla u dei uba donkti ban pyniaid iew ia ki pisa thok bad uba shah thwet ruh ha ki pulit.
Na ka met jongu, la ioh kurup ka pisa Bangla kaba kot 2.70 lak, ar tylli ki SIM card ka Bangladeshi, saw tylli ki SIM Card ka Indian ha kaba kawei ka dei na Kashmir, bad kawei ka mobile.
Katkum ka jingiathuh ki pulit, une u khar Bangla la tip kyrteng kum u Md Bulbul Islam, 23 snem ka rta uba dei na Pratapur, Goiinghat, Sylhet district ha Bangladesh. La kem ia u na Khyndai Lad hadien ba la ioh jingtip ba bniah ia ka jingdon jongu ha katei ka jaka hynne ka janmiet.
“U dei uba la shah thwet halor ka jingdonkti ban pyniaid iew ia ki pisa thok” la ong ki pulit.
La kem ia u ha ka por 2 baje janmiet.