Shah kem u hynmen jong u myntri ka tnat ‘Revenue’ ka sorkar Jylla

Shillong: Ki pulit ka thanat Umkiang ha ka miet 26 bad 27 tarik rymphang 2020 ki la ioh bat 24 tylli ki trok kit dewiong beain na East Jantia Hills sba thmu shalan sha Malidor Assam bad ki la ioh ruh ban kem ia 8 ngut ki briew ba donkti ha ka jing shalan tuh dewiong bad kiba kynthup ia u hynmen jong u myntri ka tnat ‘Revenue’ ka sorkar Meghalaya.

Ki 8 ngut kiba shah kem ki long u Bison Shylla, Tre Rymbai, Dipsy Bareh, Pyllun Ksoo, Anthony Sumer, Alal Uddin, Abdul Satar bad u Badral Hussain kiba thmu ban shalan dewiong beain sha Malidor in Assam.

Ha u 2018 ka ‘Directorate of Mineral Resources’ ka la sam ia ki ‘challans’ na ka bynta ban shalan ia kumba 30300 mt u dewiong bad u Bison Shylla u ba dei u hynmen jong u myntri ka tnat ‘Revenue’ ka jylla bad u Tuifill Shadap kila ioh ban shalan haduh 24200 mt u dewiong.