Shah kem u heh pulit ka Nagaland

Shillong,2 Nohprah:
U Heh pulit ba la shong thait ka jylla Naga land u la shah kem noh ha ka sngi saitjain ha ki pulit ka ri-Bhoi, hadien ba ki la lap bad ioh kurup ia ki tiar Wireless kiba u la thmu ban pynpoi sha ka kynhun lehenoh ka GNLA. Utei u heh pulit u dei uba la tip kyrteng kum u Robert Sangma u dei u sub-inspector ka tnad pulit ha Nagaland, u dei u pulit ba la shongthait uba trei mynta kum u Commander ki nongap pahara (Security) jong ka CMJ Breweries kaba don ha Byrnihat. La kem ia utei u heh pulit na ki thain ka Maukhuli ka jaka kaba don ha ki khappud ka Kamrup district.
Nalor utei u heh pulit ki pulit ki la ioh kem ruh ia saw ngut kiwei pat kiba la tip kyrteng kum u Moya Khohung, u Zamthoson Haokip, Suntak Prem Baite bad u Ramzan Khubang. Na kitei kiba la shah ki la ioh ban kurup ia ka wireless set, China-made TYT TH-F8 kaba la wanrah na ki thain ka Myanmar bad kaba la thmu ban pynpoi sha u Finance secretary ka GNLA u Rakkam D Shira.
U SP ka Ri-Bhoi District u la iathuh ba la ioh kem ia kitei ki san ngut ki snar pyniaid tiar sha ka GNLA, dei hadien ba ki pulit ki la ioh ka jingtip kaba biang bad ki la iai kthong haduh ban da ioh kem ia ki. U CVS Reddy SP Ri-Bhoi u la iathuh ba hadien ba la ioh jingtip kaba biang ki pulit ki la leit ban khynra ha kitei ka thain ka Maikhuli bad ki la ioh ruh ban kurup ia ki tiar kiba kitei ki san ngut ki don jingthmu ban phah sha ka GNLA. Ki pulit ki la kynnoh ba kitei kiba la shah kem ki dei ruh ki briew kiba ju phah ia ki tiar siat bad ki kuli sha ki kynhun lehnoh ka GNLA. Haduh mynta ki pulit ki dang tohkit ban lap ia ka tynrai naei katei ka tiar ka wan.