Shillong, 12 Iaiong:
Ha ka sngi saitjain, ki pulit jong ka nongbah Shillong ki la ioh kem ia uwei u doctor uba la tip kyrteng kum u Jimmy Carter Sangma( 38 snem karta). La kem ia utei u doctor, namar ba u la rahbor ia kawei ka khyn nah kynthei kaba dang 14 snem karta na Tura da ka jingthmu ban leh be-ijot ia ka. U Jimmy u la rahbor ia kawei ka khynnah 14 snem na Montfort School kaba don ha Tura ha ka sngi thohdieng ha ka por ba la wai skul, da kaba khroh ia ka ba un leit pynbuh lem ia ka sha ing.
La kynnoh ba utei u Doktor uba dang shu tyrwa shen ialade ban long kum u ksiang u ban wanrah sha ka miej ia kren ia suk hapdeng ka sorkar bad ka GNLA , u dei ruh uba don ka jingiadei ba jan bha bad u Chairman ka GNLA uba don mynta hapoh along u Champion R Sangma.
La iathuh ba ha ka jan miet sngi thohdieng, ha ka por ba dang shu wai skul, u la khot ia kawei ka khynnah kynthei bad u la khroh ba kan rung hapoh kali Scorpio jong u ba un leit pynbuh lem ia ka sha ing, hynrei u la ialam pynban ia ka sha khapsor jong ka sor Tura, hynrei la ong ba ha katei ka por katei ka khynnah kaba la kham shalak ka la ioh lad ban phah da ka SMS sha ki kmie ki kpa jong ka ban ia thuh ia katei ka jingjia ba ka la shah rahbor. Ha katei ka por , ki kmie ki kpa jong katei ka khynnah ki la pyrshang ban phone ia ka, hynrei utei u doctor u la sei noh ia ka bateri jong ka mobile phone jong ka, khnang ba yn ym don ba tip shano katei ka khynnah ka don. Hadien bym ioh phone shuh ia ka khun, wut wut ki kmie ki kpa katei ka khynnah ki la mareh sha Araimile Police Beat House bad ki la ujor, ha kaba ki pulit ki la ai khubor sha baroh ki Police Station bad Outpost kiba don ha baroh kawei ka jylla shaphang katei ka jingjia. Kham hadien la iathuh ba utei u doctor u la kit ia katei ka khynnah ha Guwahati, bad u la pynsah miet ha kawei na ki hotel kaba don ha katei ka nongbah baroh shimiet, bad ha ka sngi saitjain u la thmu ban wan phai sha Shillong, hynrei u la shah bat noh ha ki pulit haba u la poi ha Mawlai.
“La kem ia u bad la ioh pyllait im ia katei ka khynnah na Mawlai hi, ka la iathuh lut ia baroh ki jingjia ba u la leh ia ka” iathuh ka khubor na ki pulit. Ki pulit ki la kurup ruh ia katei ka kali ba u Doktor Jimmy u la niah. La iathuh ba katei kam dei ka sien ba nyngkong ba utei u doctor u la leh ia ki kam pyntriem, hynrei la ong ba u ju don ka jingmlien ban pynbiej ia ki khynnah kynthei khamtam ia ki khynnah skul , da kaba pynbiej ba un shongkurim ia ki, hynrei u shu pynjot kai ia ki, la ong ba ban lait na ki jingshah byrngem u thaw buit da ka jingpyniadei ialade bad ka seng lehnoh GNLA. Lah ban pynkynmaw ba ha ka taiew ba la dep, utei u Doktor u Jimmy Carter Sangma ryngkat bad u paralok ba ia jan eh jong u uba dei ruh u heh spah u Arun Marak, ki la leit ia kynduh ia ka sorkar jylla lyngba u Deputy Commissioner ka West Garo Hills u Pravin Bakshi ban tyrwa ialade kum u Ksiang ban wanrah sha ka miej jing iasuk ia ka GNLA ba ka sorkar jylla. Khyndiat snem mynshuwa ki pulit ki la bat ia u bad ki la khynra ia ka kali jong u, namar katei ka jingkynnoh ba u don jingiadei bad ka GNLA, la kynnoh ba utei u Doktor sorkar uba trei ha kawei na ki jaka sumar ha East Garo Hills um ju poi tikna sha jaka trei jong u, hynrei u lapmiet ha ka kam khaii dewiong. Ki pulit ki la kynnoh ruh ba kham mynshuwa u la pynkhreh ruh ialade ban bat ia ka kam Defense Secretary ka GNLA.
Phi don ban ong eiei?