Shah kem u dkhot ka ASAK

Shillong, 20 Jylliew: Ki pulit jong ka West Garo Hills ki la ioh kem ia u dkhot jong ka seng pyntriem ka A’chik Songna An’pachakgipa Kotok (ASAK) na kawei ka jaka kaba don ha shnong Purakhasia ha West Garo Hills ha kane ka sngi Thohdieng. Ia une u dkhot kane ka seng pyntriem la ithuh kyrteng kum u Balsrang Ch. Momin, 28 snem bad u la shah kem ha ka jingkhynra jong ki pulit ha iing jongu ha shnong Junungpara hajan ka Purakhasia kaba don ha khappud ka India bad ka Bangladesh kaba jngai kumba 48 km na sor Tura.

U SP ka West Garo hills u Mukesh Singh u la ong ba ki pulit hadien ba la ioh ia ka jingtip kaba bniah halor ka jingdon jong utei u dkhot katei ka seng, ki la leit ban pynlong ia ka jingkhynra bad ha kane ka jingleit, la ioh ban kem ia u na ka iing sah jong u. La kem ia u ha ka por 10:30 baje mynstep hynne ka sngi Thohdieng. Katkum ka jingiathuh une u heh pulit, une u dkhot u la phla ba u dei u dkhot jong katei ka seng bad ka jingtohkit ka dang iaid. Ka seng ASAK ka dei kaba pait na ka Garo National Liberation Army (GNLA) bad ia kane ka seng la ialam da u Finance secretary barim ka GNLA u Reding T Sangma. Ia kane ka seng la thaw ha u Rymphang mynta u snem.