Shah kem u CM Jha na Bihar, mynta un poi Shillong

Shillong, 22 Iaiong:
U Chancellor ka CMJ University u CM Jha u la shah kem mynta a sngi ha ki CID ka Meghalaya ba iatreilang bad ki pulit ka Bihar na kawei ka shnong ha jylla Bihar katba u dang mut ban leit ban ialap elekshon ha Jhanjharpur constituency kaba u iakhun elekshon MP kum u kyrtong shimet.
Ia u Jha uba dei u kha-heh jong ka skulbah, yn wanrah sha Shillong lashai ka sngi ban pynlong ia ka jingtohkit halor ka jingkynnoh donkti jongu ban pyniaid beain ia kane ka skulbah.
Katkum ka khubor na ka tnad CID, la iathuh ba la kem ia u Jha hadien ba la pynlong ia ka jingthwet la slem bah bad ruh hadien ba ka Kashari ka la weng noh ia ka jamin ba u la pan kham mynshwa bad ailad ia ki CID ban kem ia u. “Ia u CM Jha la kem na shnong Madhubani District, ha Bihar”, la ong ka khubor na ka CID.
La iathuh ruh ba la ioh hukum ban wanrah noh ia u sha Shillong khnang ban pynlong ia ka jingtohkit kaba bniah. Ka jingioh kem jong ki CID ia u CM Jha kan long ka jingjop kaba khraw hadien slem ba la thwet ia u. Kham mynshwa, kiba shah kem dei tang kiba kham rit kyrdan suda.
Lah ban kdew ba ki CID ki la khynra ia ka CMJ University hadien ba u Lat barim ka jylla u RS Mooshahary, u la hukum ban khang syndon ia kane ka skulbah hadien ba la lap ba ka la treikam beain.
Da ki hajar tylli ki kot ki sla bad ki tiar kane ka skulbah, la kurup da ki CID ha kine ki bnai ba la dep bad kumjuh jong ki kot ki sla jong ki samla ba la shu thaw thok.
Kham mynshwa, u Dhanwan Singh Matharoo uba dei u chairman ka Apex e-Learning Bangalore u la shah kem ha ka 9 tarik Lber.
“Ki la pyndep ia ka jingpynrung kyrteng haduh 10,000 ngut tam ki samla pule ha ki tnad pule bapher bapher ka ri. Ka jingioh lum pisa ka la kot sha ki klur”la ong ka thymmei khubor.
Ki pulit CID ki la ong ba kin kem ia u CM Jha hadien ba ka iing Kashari ba hakhliehduh ka Supreme Court ka la weng ia ka jingpan jamin u Jha,” la ong shuh shuh ka thymmei khubor.
Ha ka 7 tarik Lber, ka Supreme Court ka la weng ka jingai jamin ia u Chanchellor ka CMJ University.
Ia u Jha la ialam da u Inspector Y Chettri bad ki pulit ka Bihar ha ka 18 tarik Iaiong ban leit kem ia u.
“Ngi la ioh ia ka hukum ban nym ai jamin na ka CJM Court ha ka 10 tarik Iaiong ban kem beit ia u Jha”, la ong khubor.
Ka CM Jha university ka la shah kyndang ha ki pulit halor ka jingkynnoh ba ka la treikam beain ban ai kyrdan PhD ia ki 434 ngut ki samla ha u snem 2012-13, bad pynrung kyrteng 490 ngut ki samla na ka bynta ka kyrdan PhD ha u snem 2012-2013.