Shah kem u bah Julius Dorphang na Assam; 5 sngi yn tohkit ki pulit

Shillong, 8’lyngkot:
U MLA ka Mawhati u bah Julius Dorphang, u la shah kem ha ka miet sngi thohdieng na Inter State Bus Terminus kaba don ha Garchuk kaba don ha ka jylla Assam. La kem ia u bah Julius ha ka por 11 baje tam mynmiet da ki pulit ka Meghalaya ha ryngkat ka jingsynran-lang ki pulit Assam. Hadien ba la shah kem la wanrah ia u sha nongbah Shillong bad ha ka sngi saitjaiñ ki pulit ki la leit rah ia u sha ing kashari ka District & Session Judge bad la ai bor ha ki pulit ba kin tohkit ia u 5 sngi.
Shuwa ban leit rah ia u bah Julius Dorphang sha ing kashari u bah Vivek Syiem SP (City), haba kren sha ki nongthohkhubor u la ong ba katkum ka kes 239 kaba la rejistar ha Laitumkhrah PS ha ka 24 tarik u nohprah, 2016 bad hadien ba u bah Julius u la mih na Shillong ha ka 27 tarik u nohprah la lap ba u phet rieh bad ki pulit ki la khynra ha kiba bun ki jaka ban kem ia u hynrei dei hadien kumba 11 sngi ki pulit ki la ioh kem ia u na ISBT, Guwahati.
Ki pulit ki la ioh kem ia u bah Julius hadien ba la khynra bun tylli ki jaka kynthup ha ophis u Anup Chetia u nongialam barim ka ULFA. La ong ba ha ka por ba la ioh kem ia u, u don tang marwei hi.
U bah Vivek u la ong ba la pyntip ruh sha u Speaker ka Assembly ba la kem ia u bah Julius Dorphang bad ki pulit kin sdang ia ka jingtohkit tang mar ia ioh bor na ka kashari.
Hadien ka jingialam kashari da ki pulit Shillong la ong ruh ba kin pan sa ki pulit Ri-Bhoi na ka kashari ban tohkit ia u.
U bah Vivek Syiem u la ong ba ki pulit ki dang pan na ka kashari ban pynngat ia u bah Julius ha ka kyndon 5 (C) 6 jong ka POCSO Act kaba dei na bynta ka aiñ ka ban treikam na bynta ki shakri paidbah, nalor kiwei pat ki kyndon ba la pynngat ia u ba kynthup ia ka kyndon 366(A) jong ka IPC bad ruh ha ka kyndon 3(a)/4 jong ka Protection of Children from Sexual Offences Act (POCSO) bad ka kyndon 5 jong ka Immoral Trafficking Prevention Act (ITPA).
Katkum ka khubor na ki pulit la ong ba la ialam sha u bah Julius ha ka step sngi saitjain sha Sadar Police Station bad hadien la ialam sha Civil Hospital, Shillong ban eksamin ki doctor bad hadien katei la ialam beit sha kashari.
U bah Julius Dorphang u chairman barim ka seng HNLC ula shah pynngat ha ka kyndon 366(A) jong ka IPC bad ruh ha ka kyndon 3(a)/4 jong ka Protection of Children from Sexual Offences Act (POCSO) bad ka kyndon 5 jong ka Immoral Trafficking Prevention Act (ITPA) namar ka jingshah kynnoh shong lok jubor ia kawei ka khynnah rit.