Ki dkhot jong ka jaitbynriew Kuki, ki la pynlong ia ka jingiaid paidbah, kaba jar jar, ha Churachandpur, hynnin ka sngi, hadien ka jingmih paidbah jong ka video, kaba pyni, ia ka jingshah leh beijot jong ki arngut ki kynthei, da kaba ki shah pyniaid lyngkhuid bad sa kawei kaba shah bat tnga jubor. Kitei ki nongiaid paidbah, ki riam ialade da ki jain iong baroh bad ki dawa, ba dei ban ai ka jing pynsaja, kaba tyngeh ia kito kiba leh beijot ia ki arngut ki kynthei.
Ki pulit jong ka Manipur, hynnin ka sngi, ki la kem ia uwei uba donkti, ha katei ka video, kaba la paw paidbah, kaba don kumba 26 sekhon bad ia utei la ioh kem na Thoubal district. Ha kajuh ka por, ki pulit, ki la register case, ha ki kyndon jong ki kam rahbor, kam pyniap briew bad kam bat tnga jubor, ha Nongpok Sekmai police station ha Thoubal district pyrshah ia kitei ki riew pyntriem, kiba don bynta ha katei ka video. Hadien, ba la ioh kem ia utei uwei uba paw dur ha khmat eh, kham hadien, ki pulit, ki la ioh kem ruh sa ia laingut kiwei pat, ha katei kajuh ka jingjia.
Kane ka dei tang ka jingleh bymbanse namar ba la long viral ka video. Lada dei shisha ba don ka jingsngewkhia ia ka jingjia ha Manipur, la dei ban shimkhia naduh kaba sdang ki jingiaumsnam. Kane ka dei tang ka jingleh mynleh namar ba la shim da u CJI.