Shah kem sa 5 ngut, kiba donkti ha ka kam pynpra iing ha New Balakhwa

Nongpoh: Haba iadei bad ki briew kiba la shah kynnoh halor ka jingshah pynpra ia ka iing u Bah Micheal Warjri, Secretary ka Hima Nongspung, kaba la jia ha ka 7 tarik u Jymmang ha ka shnong New Balakhwa, ki Pulit ka Ri Bhoi, hynnin ka sngi ki la lah ban kem ia 5 ngut ki briew kiba la shah kynnoh ba ki la donkti ha katei ka kam pynpra bad pynjulor ia ka iing u Bah Micheal Warjri.
Kitei ki san ngut kiba la shah kem, ki kynthup Noren Rabha, u Nripen Sangma, u Noksi G.Momin, Lachit Rabha bad u Pronab Rangsa, kiba dei ki nongshong shnong kiba sah ha katei ka thain.
Ka jingkem ki Pulit ia kitei ki 5 ngut, ka dei ruh hadien ba District Court ha Ri Bhoi, ka la kyntait ban ai jamin ia kitei ki briew, wat haba ki la wan sha ka Iingbishar ban pan Jamin na ka Iingbishar khnang ban lait shah kem na ki Pulit.
Kitei kiba la shah kem noh ha ka Pulit hynnin ka sngi, ki dei ruh kiba la paw kyrteng katkum ka Ejahar, kaba la ujor da ka khun u Bah Micheal Warjri ha Nongpoh Police Station.
Lah ruh ban kdew hangne ba ka Iingbishar District & Session Judge ha Ri Bhoi, lynga ka order kaba la pynmih ha ka 29 tarik u Jymmang, ka la hukum ia u IO uba la shim ia katei ka case ba u dei ban kem ia baroh kito ki briew kiba la paw kyrteng ha ka ejahar bad ba ki dei ban buh ia ki 3 sngi ha ka Police Custody.