Shah kem ki kontraktor ba thmu ker sainar shiah, ba pynbam pisa

Guwahati: Hynnin ka sngi, ki heh jong ka Central Bureau of Investigation (CBI), kiba na Shillong, Kolkata bad Delhi, ki la kem ia U Rakesh Mohon Kotwal, zonal manager ka National Projects Construction Corporation Limited (NPCC), bad U Binod Singhi, director ka Shree Gautam Construction Company Limited.
Ka CBI, ka la khynra ruh ha ki 18 tylli ki jaka bad ioh kem sa 5ngut kiwei pat pat, halor ka jing donkti jongki ban siew pisa, na ka bynta ban ioh trei kam, na ka bynta ban ioh tei ia ki mawpud bad ki sainar shiah lem bad kiwei de ki kam, kiba don jingiadei bad katei ka kam ker sainar hi baroh kawei sha khappud bad ka Bangladesh.
Na kitei kiba la shah kem ki long U Binod Singhi, uba dei u para jong U Ashok Singhi, MLA jong ka seng BJP bad nangta sa U Anish Baid, Director ka Shree Gautam Constructions, ha kaba la kem ia u na Guwahati bad nangta sa U Latiful Pasha, u manager-engineering jong ka NPCC, na Jalpaiguri, nangta sa U Dharmendra Kumar, U Ramesh Kumar bad U Sunil Kumar na Delhi.
Katei ka jing tohkit ka CBI, ka sdang lyngba ka jingioh kem ia U Ramesh Kumar, uba dei u nongtrei jong ka Shree Gautam Constructions, ha ka Sngi U Blei ba ladep, na kawei ka hotel ha Delhi, ha ryngkat bad ka pisa kaba T.25lak.
Ka CBI, ka la lap ba ha U Lber mynta u snem, ka NPCC, ka la thung ia U Latiful Pasha, kum uwei na ki nongtrei, na ka bynta ban pyniaid ia ka rukom siew pisa sha ki ophisar heh, na ka bynta ban ioh trei ia ki kam thung mawpud, ban ker sainar shiah bad kumta ter ter.
Ha ka taiew ba nyngkong jong u Naitung, la bthah ia U Director ka Shree Gautam Constructions ban siew ia ka pisa kaba T.40lak, namar ba ka dei ruh ka por ban sdang ia katei ka jingtrei, ha kaba la bthah ban siew ia katei ka pisa ha Delhi. Ym tang katta, hynrei la phah shuh shuh ban siew tam sa T.25lak, ha kaba na katei ka pisa, ka don T.20,70,000 ba la siew da U Binod Singhi na Silchar, uba dei ruh U director ka Shree Gautam Constructions.
La iathuh ba ia U Rakesh Mohon Kotwal bad U Binod Singhi, la kem hynnin ka sngi na Silchar bad yn ialam sha New Delhi, mynta ka sngi, na ka bynta ka jingtohkit kaba kham bniah halor katei ka kam.