Shah kem ka thei samla, ba dawa T.4 lak na u lok kaba haing

Shillong,6 Iaiong:
Ha ka sngi saitjain jong ka taiew ki pulit ki la ioh ban kem ia kawei ka briew , kaba la dawa pisa na uwei u rangbah haduh T.4 lak tyngka bad ka la dawa da kaba shu phah da ka SMS na ka mobile.
Ki pulit ki la kem ia ka Pdianghun Dkhar bad ka paralok jong ka myn ha ka 5 tarik mynta u bnai na lad Kiangnangbah College, Jowai, kitei ki samla ki dei kiba na Ummu long,West Jaintia hills. Kitei ki samla ki la dawa pisa na u bah Krehbha Ryngkhlem uba shong bas ah ha Wapung Skur, East Jaintia Hill da kaba phah da kaba phone ia u ha ka 25 tarik u bnai ba la dep bad la dawa ba un pynpoi ia ka pisa ha ka 5 tarik mynta u bnai ha ka por 11 baje, hadien ba la phone dla phah jingthoh ruh sha u lyngba ka SMS ha kaba la byrngem ba lada um siew ia katei ka T.4 lak un duh noh ia ki khun ki kti bad ki baha ing ha sem jong u namarba ki la kam ba ki la buh Time Bomb ha ing jong u. Ki pulit ki la kem ia ka Pdianghun bad ka paralok jong ka , hynrei hadien ka jingtohkit la pyllait noh ia ka paralok jong ka namarba la lap ba kam don jingtip eiei shaphang katei ka kam.
La iathuh ba hadien ba la shah dawa pisa haduh T.4lak bad haba ka por ban siew ka la dei u Ma Krehbha u la phah SMS sha katei ka samla ban ong ba um pat shym la lah ban pynbiang ia ka pisa namarba haduh myngta u don tang T.1 lak tyngka ha kti, bad katei ka samla ruh ka la phah jingthoh kylla sha u ban wanrah shuwa tang kata ka T.1 lak bad pynbiang ia kaba sah pat hadien. Ka la phah ia u ban song ia ka pisa ha ka kotkhubor bad ban teh da u sailieh bad

dei ruh ban leit buh ha kawei ka dukan waidong ha Lad KNGC Kolej, kumba la batai da katei ka nongdawa pisa u Ma Krehbha u la leh kumta bad ha ka por janmiet u la leit ban ai ia kata ka pisa ha katei ka dukan die waidong, katba ki paralok bad ki pulit ki la ap thap lypa ban pynap shrip ban ioh kem ia kiba donkti.
La iathuh ruh ba hajan katei ka dukan ki don ar ngut ki kynthei kiba la ishon khmat , bad kiba leh bunkam ia ki mobile jong ki, u wei na ki paralok jong u ma Krehbha u la khot pulit bad ki pulit ki la kem ia kitei ki ar ngut bad ki lap ba na ka Mobile jong ka Pdianghun ki don ki SMS ba la phah sha u Ma Kreh, ki pulit ka Lad Rymbai Beat House ki la rah ia baroh arngut sha Beat House ban tohkit bad hadien ba la tohkit la pyllait noh ia kawei pat. Haba la tohkit la lap ruh ba ka Pdianghun ka dei kaba shi bahaing hasem ba iajan bha bad ka lok jong u ma Krehbha Ryngkhlem.