Shillong: Ki pulit jong ka Anti-Norcotics Task Force (ANTF) ryngkat bad ki pulit ka Sardar Police station ha ka janmiet jong ka 7 tarik u Naiwieng 2019,hapoh ka jingialam jong u SP ka East Khasi Hills District ki la ïoh ban jingtip ba uwei u nongkhaïi drok un sa leit ban pynpoi ïa u drok sha ka thaiñ Khyndailad.
Hadien ka jingioh jingtip ba tikna na ka liang ki pulit ANTF ki la pynap shrip bha ha kaba ki la ioh ban kem ïa u Lobkush Bohara ryngkat bad 5.93 gms u drok heroin bad la ioh kem ruh ia kawei ka kali.
Kat kum ki pulit ki la iathuh ba u Lobkush u dei uba dang pule ha ka kyrdan BA (English) ha ka ICFAI University, Shillong bad u dei ruh u ba ïa jan bad uwei pat u nong khaïi drok ïa uba la tip kyrteng kum u Haleem Miah uba ki pulit dang shen ki la kem noh na Nongthymmai.
La register case ha Sadar PS lyngba ka Case no 279(11)19 hapoh ka section 21(b) jong ka NDPS Act 1985.
Katba ha ka sngi ka ba bud pat, kata ha ka step jong ka 8 tarik u Naiwieng 2019, lyngba ka jingïarap jong ka kynhun syntiat jong ka Assam Rifles, ka kynhun ANTF ka la ïoh ban kem sa ia u wei pat u briew u ba kyrteng u Rahul Das bad na u la ioh ban kurup ia u drok heroin u ba 119.48 gms,hynrei uwei pat u nongkhaii uba la tip kyrteng kum u Imran Mynthlu u la lait phet na ki Pulit.
Na ka liang ki pulit ki dang pynlong ia ka thwet kaba jur ïa utei uba la lait phet, ha kajuh ka por ki kyrpad ïa ka jingïa trei lang jong ki paidbah ban pyntip sha ki bor pulit lada ki ïohi lane ioh jingtip eiei shaphang u Imran Mynthlu .
La register ïa ka case pyrshah ïa kitei ki arngut, kata u Lobkush Bohara bad u Rahul Das ha Lumdengjri PS lyngba ka case no 125(11)19 hapoh ka section 21(b) jong ka NDPS Act 1985.
Phi don ban ong eiei?