Shah kem 7ngut, ki dkhot jong ka National Liberation Council of Nongkyndong

Shillong: Ki Pulit ka Jylla mynta ka sngi Balang ki la ioh ban kem ia 7 ngut ki briew ba la kynnoh ba ki dei ki dkhot jong ka seng kiengatiar bathymmai kaba la tip da ka National Liberation Council of Nongkyndong (NLCN), bad napdeng kine ki 7 ngut uwei u dei u khynnah ba dang rit ka rta.

Katkum ka kyrwoh khubor na ki pulit la iathuh ba hadien ba la ioh jingtip b aka don kawei ka kynhun kiengatiar ba la thaw thymmai da katto katne ngut ki samla, ha kaba la iateh ruh bad ki kynhun seng lehnoh na Nagaland ban pyntbit ha ki kam kieng atiar, na ka liang ki pulit ki la pynlong ka jingkhynra bad la ioh ban kem ia kitei ki 7 ngut.

Ka khubor ka iathuh ruh ba ia ki dkhot jong katei ka seng bathymmai la thmu ban phah noh lashai ka sngi, ka 17 tarik Nailar sha Nagaland ban shah hikai ha ki kam pyntriem.

Na ka liang ki pulit ki la register case pyrshah ia kitei ki briew ha Crime Branch Police Station, Eastern Range, Shillong bad la pynngat kyndon hapoh ka Indian Penal Code bad ka Unlawful Activities (Prevention) Act. Kiba la shah kem noh ha ki pulit ym pat shim la ioh satia ia ki kyrteng, hynrei la iathuh ba ki kynthup ia u Chairman, u Commander-in-Chief, u General Secretary bad u Area Commander ka West Khasi Hills, Area Commander ka Jaintia Hills bad 3 ngut kiwei pat ki dkhot.

Katkum ka khubor, la iathuh ba ki pulit ha ka jingkhynra ia ka jaka ba la ioh kem ia kitei ki briew, ki la ioh ban kurup ia ki tiar pynbthei, ki kot ki sla bad ki mobile phone, bad na ka liang ki p;ulit ki dang thwet ia kiwei pat ki dkhot katei ka seng bad ka jingtohkit ruh ka la iaid.