Shah kem 5 ngut, ba thmu bat bor ia ka longkmie ha Hotel

Shillong,10 Jylliew:
Ka jingjia kaba la jia ha ka miet lah sngi u Blei, ka la pynduh jingshaniah ia ki paidbah nongleit nongwan ki bym don jaka sahmiet hangne ha nong bah Shillong, hynrei kiba kyrmen na ki hotel ba kin ioh ing basa.
Ha ka miet lah sngi u blei ha ka por 10 baje eiei, ki nongtrei jong kawei ka hotel kaba la tip kum ka Hotel R.K. City Hub, kaba don ha Khyndailad ki la rung jubor hapoh ka kamra ba sah wai da kawei ka longkmie kaba dang 31 snem karta, katei ka longkmie ka la bat ia ka kamra 107 ha katei ka Hotel.
Ki nongtrei katei ka Hotel ki la pyrshang ban rung jubor lyngba ki jing khangit rit ( Skylight), da ka jingthmu ban batbor ia katei ka longkmie, hynrei ha katei ka por katei ka longkmie ka la khang kut ialade hapoh kamra sum bad ka la pyntip mar mar sha ki bahaing jong ka lyngba ka phone, bad mar kumta hi kiba haing jong ka ki la pyntip sha ki pulit ka nongbah.
Marsien ioh ia katei ka jingtip, ki pulit ki mareh wut wut sha katei ka Hotel ban pyllait iakatei ka longkmie, hynrei kaba lyngngoh pat ka long ba haba ki pulit ki la poi ha katei ka Hotel la khang pyrshah ia ki ba kin rung shapoh. Hynrei khlem pynslem ki pulit ki la ioh lad ban rung jubor lyngba ka jingkhang heh jong katei ka Hotel.
Ha katei ka jingjia ki la ioh kem, ia 5 ngut ki nongtrei katei ka Hotel, kiba la shah kem la tip kyrteng kum u Kajal Paul 22 snem, u Belkish Reang 23 snem, u Bharat Jamatia 26 snem, u Md. Khaliuddin, 26 snem bad u Shiva Ranjan Ray 23 snem. Na kitei kiba la shah kem u Paul bad u Reang ki dei kiba la leit ban rung jubor ban batbor ia katei ka longkmie, bad lain gut kiwei pat la kem namar ba ki la khang jubor ia ki pulit ban rung shapoh.