Shah kem 5 ngut, ap sa kiwei ki prokram iakhih ki sengbhalang

Shillong,20 Nailur:
Ka pakhang shnong ba 12 kynta ki sengbhalang ka la kut noh mynta ka sngi ha ka por 5 baje janmiet bad ha kitei ki kynta pakhang shnong, ym shym la don kino kino ki jingjia pyntriem, lait noh ka jingshah kem jong ki 5 ngut ha ka miet ba dang treikam ka pakhang surok miet ha kaba la kem uwei na 3 mer, namar ka jingshah kawang maw ka kali kit nongpang ka Seng Samla Malki bad 4 ngut pat la kem na ki jingjia shah thang kali ha Pynthorbah.
Katkum ka jingtip ba la ioh lum la iathuh ba ha ki kynta pakhang shnong ki sengbhalang ka jingwan poi trei ki nongtrei sorkar ka la poi sha ka jiro, namar ba ha baroh 11 District la ki ophis sorkar ki la khang khyrdep lut lait noh tang ka ophis jong u SP bad ka ophis jong u DC. “Ka jingwan poi trei ki nongtrei sorkar sorkar kal ahiar palat ha kaba mynta ka la poi tang kumba hapoh ka 10%” ong u Deputy Commissioner East Khasi Hills u Sanjay Goyal. La iathuh ruh ba ka jingkhot pakhang shnong ki sengbhalang mynta ka sngi ka la ktah ruh sha ki surok bah National High Way 40 bad 44 ban hiar sha Mizoram, Tripura bad ki bynta ka Manipur bad ka Assam.
Hadien ka pakhang shnong kaba 12 kynta la ioh jingtip ba ki sengbhalang ki lah ban pynbna jingiakhih biang, ha kaba ha ka sngi u Blei ka 22 tarik mynta u bnai ki lah ban pynbna ia ki prokram ia khih jong ki.
Haba phai sha Secretariat ruh don tang ki nongap ha khyrdop, hynrei ym don nongtrei satia bad ka kynjah jar jar.