Shah kem 4 ngut ki snar, kiba lute na Petrol Pump Pomshutia

Shillong: Ki pulit ki la ioh kem 4 ngut ki nonglute kiba la lute na kawei ka Petrol Pump ha Pomshutia kaba la tip kum ka Raja Fuel Petrol Pump. Haba kren sha ki nongthohkhubor myn hynnin ka sngi u SP City u bah Steve Rynjah u la ong ba kitei ki 4 ngut ki dei kiba la tip kyrteng kum u Frankupar Nongrang (42 snem) uba ju khot sin kum u Ker na ka shnong Mawbyrngem, West Khasi Hills; u Kularshai Lyngdoh Mawnai (37 snem) na ka shnong Laitlyngkot, u Klostar Marngar (37 snem) uba ju khot sin kum u iong na ka shnong Pomblang-Blat bad u Wadbor Nongsiej (27 snem) uba ju khot sin u Thomas na ka shnong Mairang Mission.
U SP u la ong ba kitei ki dei kiba la lute na ka Petrol Pump ha Pomshutia ha ka 18 tarik u kyllalyngkot ha ka por 6:30 haduh 7:00 baje mynmiet bad ki la rong ia ka pisa kaba T.2,33,380 tyngka bad ki la shoh la dat ruh ia ki 2 ngut ki nongtrei jong katei ka Pump. Ka jingleit lute jong ki ka de ihadien ba ki la ioh jingtip bha ba ka don bun ka pisa hynrei ha ka por mynsngi u Manager u la leit thep noh sha Bank.
Hadien ba la dep lute , u SP u la ong ba ki ba iohi ia kane ki la iathuh ba ka kali jong ki ka la phet sha ki thaiñ Dawki, ia katei ka jingjia la rejistar kes ha Pynursla PS. Ka jingioh kem ia ki u la ong ba ka dei hadien ba ka la don sa kawei pat ka jingsha hlute jong kawei ka Petrol Pump ha Byrnihat bad katei ka jingjia ka ia syriem thik kum kaba la jia ha Petrol Pump, kumta ki pulit ki la sngewthuh ba ki dei kijuh ki briew bad ki la pynap shrip ia ki.
Ha kane ka taiew ba la dep ki pulit ki la lap ksai bad nyngkong eh ki la ioh kem ia u Frankupar bad la ioh kurup kawei ka pistol kaba khlainbor bha kaba la shna hi , la kurup na ingsah jong u na Mawbyrngem. Kitei baroh 4 ngut ki la phla ba ki la lute na Pomshutia bad byrnihat bad ki la phla ruh ba ki dang thmu ban lute san a kawei ka Petrol Pump kaba don ha West Khasi Hills. U SP u la ong ba kitei ki briew ki la pyrshang ruh ban pyntieng da kaba pyndonkam da ka kyrteng seng lehnoh hynrei haba la wad jingtip bha kim dei satia ki dkhot jong kano kano ka seng lehnoh.