Shillong: Ha ka 15 tarik u Naiwieng 2019 ha ka por kumba 12:30 shiteng synnia, ki Pulit hapoh ka jingialam jong u SP ka East Jaintia Hills District u Vivekanand Singh, IPS ki la ioh ban kem ia lai ngut ki jaidbynriew Africa ha ka jing khynra ha Ratacherra, katba ki dang thmu ban leit na Agartala sha Guwahati lyngba ka Bus Night Super kaba don ia u No Plate AS-01-KC-0299.
Ka tyllong khubor ka iathuh ba la kem noh ia ki hadien ba kim shym lah ban pyni ia ki kot ki sla kiba biang ban pynshisha ia ka jingrung sha India da ki lynti kiba dei. Ha kaba iadei bad kane la ai case pyrshah ia ki ha Lumshnong PS bad ka jingthohkit ka nang iaid shakhmat. Da ka jingioh kem ia kine ki jaidbynriew Africa Ki pulit ka East Jaintia ki la ioh kem haduh 22 ngut kiba wan rung tuh sha India ha kine ki ar bnai kiba la dep, bad kane ka tnad ka dang iai pyrkhing shuh shuh ka jingap phara ha kylleng kane ka thain khnang ba yn lah ban khang lad ia ka jingwan rung kyrthep kiba na bar ri sha kane ka jylla.
Myn ha ka 11 tarik u November 2019 ha ka por kumba 11:30 mynstep ei ei, ka kynhun Anti Narcotic Task Force jong ka East Jaintia Hills hapoh ka jingialam jong u SP ka Khliehriat u Vivekanand Singh IPS ka la ioh ban kem ia u Amos Malang u khun jong u Victor Dkhar na Khliehriat hajan Dkhiah hadien ba la lap ia u drug bad katto katne tylli ki tyndong thylli ba la suba ba dei u Heroin ha ka jingkhia kaba 0.46 grams. Ha kaba iadei bad kane ka Khliehriat PS ka la ai case pyrshah ia u bad ka jingthohkit ka la iaid shakhmat.
Phi don ban ong eiei?