Shah kem 3 ngut ki nongkhaii dieng iwbih

Shillong, 25nailur:
Ki pulit ka South West Khasi Hills ki la ioh kem 3 ngut ki briew kiba thmu ban khaii tuh ia ki dieng iwbih. Ki pulit ki la ioh kurup ruh 130 kilo ki symboh dieng dieng iwbih na kitei ki 3 ngut. Utei u dei u jait dieng uba shong dor da ki klur tyngka ha ka iew ia die ia thied ha India bad kitei kiba la ioh kurup ki shongdor la kumno kumno kumba 15 klur tyngka.
U SP ka SWKLH u bah Herbert G Lyngdoh u la ong ba la kem ia kitei ki 3 ngut mynta ka step na kawei ka kali Scorpio kaba don ia u nombar AS 01 BL 1962 ba la niah da u Jakir Hussain bad kiba donlang ki long u Nadir Hussain bad u Fariz Uddin. Ia katei ka kynhun ki pulit la ialam da u Christstar Sangma hadien ba la ioh jingtip na ki bor syntiat.
Na kitei ki jait dieng ba la ioh kem la ju shim ia ka umphniang kaba mih nangtei ban shna ia ki dawai pyn iwbih bad ia kitei la ju pyniaid iew bha sha ki ri Arab. La ju thung ia kitei ki dieng ha Barak Valley da ki briew kiba wan na Bangladesh ban shong shnong hangtei. Katkum ka jingiathuh ki pulit la ong ba katei ka kam ka dei kaba ju leh ha kitei ki thaiñ bad dei mynta ka step ba ki runar ki la ngat ha ka shrip.