Shah kem 2 ngut ki satar khaii drok

Shillong, 8 Jylliew:
Hadien ba la ioh jingtip kaba biang ba ki don ki nongkhaii drok ha Nongshilliang, ki pulit jong ka Anti Narcotic Task Force (ANTF) ki la ioh kem ia ar ngut ki satar khaii drok na katei ka jaka. Mynta ka step ha ka por 10:30 baje eiei ki la ioh kem ia kawei ka briew kaba la tip kyrteng kum ka Rechel Ralte, 32 snem karta kaba sah ha Nongrim Hills, Shillong bad na katei ka la ioh kurup ia ki kynja dawai ba la suba ba ki dei ki drok Heroine.
Hadien ba la shah kem katei ka briew ka la ialam ia ki pulit sha ing jong uwei u nongpynioh drok ia ka uba la tip kyrteng kum u John Baglary 33 snem karta uba shong basah ha Nong shiliang Block II bad ha ka jingkhynra ia ka ingsah jong u ki pulit ki la ioh kurup bun ki drok Heroine. Ki la don haduh 13.1 kram ki drok na kitei ki briew, kumjuh ruh ka pisa T. 15012 tyngka bad ka Scooty kaba don ia u nombar ML 05-N-7249 kaba la pyndonkam ban kit drok.