Shah kem 2 ngut ki doktor buaid ka Civil Hospital rBa byrngem ia u nongpang, ba leit shim dawai

Shillong, 20 Naitung:
Ar ngut ki doctor ka Civil Hospital ki la shah kem ha ki pulit mynta ka sngi, namar ka jingbyr ngem jong ki, ia uwei u nongpang u ba la leit ban shim dawai na katei Hospital. Katei ka jingjia ka la jia ha ka por 8:30 baje ha ka miet sng u Blei. Kitei ki 2 ngut ki Doktor kiba la shah kem ki dei kiba la tip kyrteng kum u Dr.Willing Pde bad uwei pat kum u Kevin ZM Sangma. Ki pulit ki la kem ia kitei ki 2 ngut ki doctor ha ka por 8 baje mynta mynstep hadien ba ki la ioh jingujor bad la phah ia ki sha NEIG RHIMS na bynta ban phah eksamin.
Kitei ki ar ngut ki Doktor ki la shah kem hadien ba ki pulit ki la ioh jingujor na uwei u nong pang uba la tip kyrteng kum u Pynshailang Kur bah, 30 snem karta na ka shnong Paltan Bazar. Utei u nongpang u la leit ban shim dawai napoh Civil ha ka miet sngi u Blei, hynrei la ong ba u Doktor u la phah ia u ban sah hapoh Hospital, hynrei utei u nongpang um treh bad u kwah tang ban shim dawai.
La ong ba namar ba um kohnguh ia katei ka jingbthah u doktor, u doctor u la byrngem ia utei u nongpang bad hangtei ka la mih ka jingiapyni nia hapdeng u nongpang bad u doktor kaba la pynmih jingsawa hapoh Hospital baroh kawei. Tang hadien katto katne por la ong ba ki pulit kiba don ha ka Police Booth ha Civil ki la leit ban tuklar ia katei ka jingiakajia hynrei la ong ba kitei ki ar ngut ki Doktor ki la byrngem kylla pynban ia ki pulit.
Katkum ka khubor pulit la iathuh ba utei u nongpang u la ujor, pyrshah ia kitei ki ar ngut ki doctor kiba la byrngem ia u bad la ong ba u la thoh ba kitei ki doktor ki don hapdeng ka jingbu-aid kyiad. La ong ruh ba utei u nongpang u la mynsaw malu mala ha katei ka jingjia bad la sop la spain ia u hapoh Civil Hospital hi. Haba ia kren bad u SP City u bah Vivek Syiem u la ong ba katei ka jing ia kajia hapdeng ki Doktor bad u nongpang ka la jia ha ka por 8:00 baje mynmiet bad hadien ba la ioh jingujor ki pulit ki la leit kem ia ki ha ka por 8:00 baje mynta ka step.
La leit rah hapoh iing bishar ia kitei ki ar ngut ki doctor ha ka por 10:00 baje mynta ka step bad ka iing bishar ka la ai bor ia ki pulit ba kin tohkit lai sngi. U bah Vivek u la ong ba mynta kitei ki doctor ki don hapoh Sadar Police Station. Na kiwei pat ki lad khubor la iathuh ba ha ka miet sngi u Blei ka la don ka huri hura bah hapoh Civil Hospital hapoh Emergency kaba ki nongtrei ba kham hapoh katei ka hospital kim nud ban mih lane ban kylli ia ka daw, hynrei ki trei beit la ka jong ka kam, hynrei kham hadien ki ioh jingtip ba ka don ka jingkulmar hapdeng ki doktor bad u nongpang. Ki pulit ki la rejistar lai tylli ki case ia kitei ki ar ngut kaba kynthup ia ka section 353, 336 bad section 506.