Shah kem 2 ngut ba pyniap ia ka longkmie ha lyngkha rep

Jowai, 28 ‘lyngkot:
Ki pulit ka Lad rymbai Out post ki la ioh kem ia ar ngut ki briew kiba donkti ban pyniap ia ka kong Yior Dkhar, 40 snem tam karta kaba dei na ka shnong Tuber Kmai shnong, katei ka longkmie ka la shah pyniap ha ka ing trep kaba don ha ka lyngkha rep jong ka ha ka sngi hat majai jong ka taiew. Kitei ar ngut kiba la shah kem ki dei kiba la tip kyrteng kum u Dawanmi Dkhar 25 snem bad u Rin kyndait 23 snem kiba na ka shnong Tuber Kmaishnong East Jaintia.
Ka khubor na ki pulit ka iathuh ba kane ka longkmie ha katei hi ka sngi ka leit sha katei ka lyngkha katba u lok jong ka pat u la sah miet lypa. Ha ka por janmiet wan poi u pyrsa u lok katei ka longkmie sha katei ka jaka uba wan shangkai mynsngi sha katei ka thain ula wan khot ia u Kni ban pynlait ia ka kali jong u ba ka sah kut.
Kumta ha ka por 10 baje mynmiet ki la ieh ia ka marwei bad leit pyllait ia katei ka kali, hynrei hadien shiteng kynta haba la wanphai ki la lap ba ka la shah pyniap, ha kane ka jingshah pyniap la don ki dak mong ha ki kti bad na ka liang ki pulit ki dang pynlong ka jingtohkit ban lap ia ka daw ba kitei ki arngut ki la pyniap dusmon ia katei ka longkmie.