Shah kem 2 ki suba HNLC, kurup shithi dawa pisa

Jowai, 9 Jylliew:
La jan shi taiew myn ta, ar ngut ki suba HN LC ki la shah kem ha ki pulit, hynrei ki nongthoh khubor ki dang ioh jingtip mynhynin ka miet na ki tyllong khubor kiba thik na bha. La iathuh ba ki pulit kim kwah ban pyn paw sha ki nongthoh khubor ia katei ka jingjia naba kim kwah ban kan paw pyrthei namar ba ki dang thwet ia kiwei pat.
Katei ka jingioh kem ki pulit ia ki 2 ngut ki suba HNLC ka dei hadien ba ki la ioh jingtip ba ki la don bunbah ki shithi dawa pisa ka HNLC ba la sam sha ki heh spah jong ka ri Lum Jaintia ha une u bnai ba la dep. Haba buddien ia katei ka kam la ong ba ki pulit ki la ioh kem nyngkong eh ia u Nangpynphriang Rymbai na ka shnong Tongseng kaba hap hapoh ka East Jaintia hills ha ka 3 tarik u jylliew. Hadien ba la tohkit ia u Nangpynphriang ki la ioh kem sa ia u Junel Tongper na ka shnong Lumphyllut, Umkiang, East Jaintia Hills ha ka 4 tarik u jylliew ka sngi kaba bud.
Na u Junel ki pulit ki la ioh kurup bun bah ki shithi dawa pisa jong ka seng HNLC, bad ha ka jingtohkit ki pulit la iathuh ba u Junel, u la phla bad ialam sha ka jaka ba la buh ia ki tiar pynbthei ha kaba la lap ia ar tylli ki bom hand grenade na ka shnong Lumphyllut na ka jaka ba u la ialam. Kham hadien u la ialam sa sha ka shnong Lathisara kaba don ha Barak Valley, Assam bad nangne ki pulit ki la ioh kurup kawei ka pistol. Kitei baroh 2 ngut ki dang don mynta ha kti ki pulit bad ka jingtohkit ka dang iaid shakhmat.