Shah kem 2 ki lehnoh UALA

Shillong, 21 Jymmang:
Ha ka sngi balang jong ka taiew, ar ngut ki dkhot jong ka seng lehnoh United A’chick Liberation Army (UALA) ki la shah kem najan ka shnong Birubari kaba don ha North West Garo hills. La kem ia ki ryngkat ki tiar ialeh ba ki pyndonkam , la kem ha ka por ba ki pulit bad ki shipai ki leit khynra lehnoh ha katei ka thain.
Kitei ki ar ngut ki lehnoh ki dei kiba la tip kyrteng kum u Arnes Momin uba ju khot sin u Dikdik bad u Lepin R Sangma ba ju khot sin u Dilsang Sangma, uba dei ruh u Commander jong ka Goalpara district in Assam. La ioh kurup kawei ka 7.65 mm pistol, kawei ka suloi shna hi, bad ki kuli , la kurup ruh ia ka thuk thuk bad kiwei pat ki tiar donkam jong ki. Kitei 2 ngut ki dei kiba ia don jingiajan bha bad u Sinbirth Momin ba ju khot u Norok, u ‘C-in-C’ ka UALA , bad ki dei kiba don kti ha ka jingpyniap briew ha Gandabari ha u naiwieng 2013, ha kaba 7 ngut ki jaitbynriew Rabha ki la shah pyniap.