Khadsaw ngut ki samla kiba dei ki dkhot jong ki sengbhalang ba pher bapher ki la shah kem halor ka jingkynnoh ban kawang maw, thang kali ha ki jaka bapher bapher jong ka nongbah Shillong. Na kine ki samla ba shah kem, ki pulit ki la kam ba ki la ioh kurup ki tiar kum ka umphniang petrol, ka wait, 3 tylli ki jri siat, bad ki maw ba thmu pyndonkam ha ka pakhang shnong.
Ki samla kiba shah kem ki long Samkupar Lyngdoh (28 snem), Walstar Nongdhar (28 snem), Anthony Sangma (32 snem), bad Balan Kharkongor (28 snem). Kine baroh ki shah kem na Hynniew Mer, bad na ka kali jongki, la ioh kurup ruh ka umphniang petrol lai bitor quarter, bad kine ki la kam ba ki dei ki dkhot ka KSU, la ong u SP u Bah Mariahom Kharkrang.
Nalor kine, ar ngut la kem na skul Wilco Pynthorbah kynthup Jibarkor Thabah (22 snem) bad u Banjop War (23 snem).
Shuh shuh ki pulit ki la kem ruh ia u Stadbor Dhar (27 snem) bad u John Syiemlieh (20 snem) na Mawsynram.
Kiwei pat kiba shah kem na Mawlai Mawroh ki long Shanborlang Kshiar (30 snem), David Ryngki (23 snem), katba lai ngut la kem na Mawlai Iewrynghep ba kynthup u Wanlambok Wansai (21 snem), Smallingstar Nongsian (24 snem), bad u Esteiliborn Khonglam (22 snem). Kumjuh ki pulit ki la kem ruh ia u Arki Rymbai (25 snem) na Sunny Hills.
Na ka liang u SP u la ong ba la kem ia kine baroh halor ka jingsuba donkti ha ki kam thang kali, kawangmaw, bad ban pynthut ia ka suk ka sain hadien ba ki sengbhalang ki la khot ia ka pakhang shnong ba 12 kynta.
“Kiba shah kem ki dei ki dkhot ka KSU, HNYF bad kiwei kiwei ki sengbhalang”, la ong u SP haba kren mynta ka sngi, hadien ba la wai ka kynta jong ka pakhang shnong jong ki sengbhalang kiba dawa ban pyntreikam iaka Inner Line Permit (ILP) ha ka jylla.
Ia kine kiba shah kem la pynngat ha ki kyndon ain Meghalaya Maintenance of Public Order (MMPO), la ong u SP.
U la ong ruh ba ha kane ka kynti namar ba ki pulit ki la pahara bha bad phah husiar ia ki kali sorkar, na ka liang ki runar ki la pyrshang ban kthong sa ia ki kali paidbah bad ka la kumba la jia ha kaba ki kali kamai ki la shah kawang petrol bom.
Hynnin ka sngi, ki jingjia kiba kham jubor, ki kynthup ia ka jingshah kawang petrol bom jong ka ktem ki CRP hajan ka jingkieng Mawlai Iewrynghep bad nangta sa ka jingshah thang ka thuk thuk ML 05 J 3405, kaba dei ka jong U Bah Vivian Richard Nongsiej, kaba la jia ha ka miet jong ka Sngi Saitjain. Ha kawei pat ka jingjia, kawei ka kali kamai Maruti, ka la kem ding hynnin ka miet hi ha Langkyrding ha ka por kumba 11: 30 ei ei mynmiet. Ia kane ka kali kamai maruti (ML05-E-0226), la wiang ding ha jaka ba set ia katei ka kali, iing jong I kong I E Kharbani.
U trai jong kane ka kali uba dei u dkhar u sah ha thain Rynjah katba ia kali la ju wan set ha katei ka jaka jong I Kong Kharbani ha Langkyrding.
Phi don ban ong eiei?