Shah kem 11 ngut,

Shillong, 30 Risaw:
11 ngut ki dkhot jong ki sengbhalang na Mawlai ki la shah kem mynta ka step ha ki pulit bad na kitei ki 11 ngut; 10 ngut ki dei ki dkhot ka KSU, katba marwei pat u dei na ka seng FKJGP, ki samla ba shah kem ki kynthup ruh ia u President ka KSU Mawlai Circle u samla Biangbor Paliar. Kitei ki 11 ngut ki la shah kem katba ki dang pyn ieng ia ki trok kiba rung hapoh shnong Mawlai ban leit sha FCI bad kumjuh ruh ki trok kiba wan na ki thain Polo ban rung sha FCI. Hynrei la pyllait noh ia kitei ki 11 ngut tang hadien saw kynta ba ki la shah kem.
Haba ia kren ba ki nongthohkhubor, u samla Biangbor Paliar, President KSU Mawlai Circle u la ong ba ki dkhot jong ka KSU bad FKJGP ki la bat ia ki trok ba wan rung hapoh Mawlai ban pyn sngewthuh ia ki ia ka por ba kin rung kin mih ban leit sha FCI kumba la dep ban ia phylliew jingmut hapoh ophis jong u Acting Deputy Commissioner ha ka 29 tarik u Nailur, bad ha katei ka jingbat trok ki sengbhlang u la ong ba la donlang ruh ki nongsynshar shnong na Mawlai Nongmali, la pyntip sha ki Rangbah shnong ka Mawlai bad la donlang ruh ki pulit ka Mawlai PS.
Hynrei utei u samla u la ong ba katba ki dkhot sengbhalang ki sang bat ia ki trok ban pynshai ia ka por rung por mih kyndit kyndit ki pulit teh jain iong SOT ki la wan mih , don ruh ki pulit phong jain ing ba la synran da ki CRP ha katei ka jaka. Tang mar ia poi u la ong ba ki khlem ailad ia kren hynrei ki thom da ka bor ki kynjat ki kura naphang bad ki patan ia ki dkhot sengbhalang shapoh kali, bad ki la byrngem ban siat bad kit hew siat lada ki phet bad la kit ia ki sha Sadar Police station, bad hadien katei la leit rah ia ki sha Civil Hospital ban leh ia ka Medical check Up, u samla biangbor u la ong ba ha ka por ba dang ieng lain ha Civil hospital ban shah Check Up la pynap ia kida ki suloi kumba pyna ia ki lehnoh, u la ong ruh ba ia kite ki pulit la ialam da u SI napoh SP ophis uba um tip bha ia ka kyrteng u shu ong ba u dei u Simsang .
Haba kren halor ka mat ba ki sengbhalang ki la leit ban pynieng ia ki trok ha Mawlai, u samla Marbud Lyngdoh, President FKJGP Mawlai Circle u la ong ba ka dei ka mat ba la slem ba kitei ki ar seng ki la leit ban ia kynduh na ka por sha ka por ia ki briew ka ain hynrei ym don ba patiaw. U la pynkynmaw ba ha ka 29 tarik u Nailur 2014 ki ar seng ryngkat ki Rangbah Shnong na Mawlai, ha ka jingiadonlang u SP (Traffic) ha ka jingialang ba la pyniaid da u Acting DC u bah CVD Diengdoh ki la ioh ban ia kren bad ki ar-seng ki la ai jingmut ruh ban pynbeit ia ka por rung por mih ki trok kiba leit sha FCI, hynrei u la pynpaw ka jinglyngngoh ba wat hadien ba la dep pynbeit na ka liang u SP ka East Khasi hills bad u SP City ki ong ba kim don jingtip eiei ia kata ka jingialang, ha ka jingiakren ba la leit ban ia kren da u President Sengkmie u bah Joe Marwein.
U samla Marbud u la ong ba shuwa ban pynlogn ia katei ka jingpynsangeh trok, ki ar seng ki la pyrshang ban leit ia kynduh ia u SP Traffic hynrei um don namarba u leit phah sumar ialade shabar, kumta u la ong ba namar ka pork am shah shuh ba ki khynnah skul ruh ki la jan long eksamin khamtam na ka jingdheng kali kaba jur na ka liang ki ar-seng ki la leit ban leh hi ia kaba donkam, halor katei ka jingshah kem u la ong “Ka jingbym tip u SP EKH bad SP City kumba ki la kam ka pyn ba ki khein zero ia u SP Traffic uba donlang ha katei ka por” ong u samla Marbud.
Na ka liang ki ar-seng ki la ong ba shen kin s alum ia ka jingialang jong ki ar-seng ban pyrkhat kaei ka sienjam ban shim halor ka tei ka jingle riewkhlaw ki pulit, u samla Marbud u la ong ruh ba ki ar seng kin ym shongthait hynrei kin iai bteng biang ia ka jingpynieng trok lada jia ba ki bor ka ain kim shimkhia ban leh eiei. U la iathuh ruh ba ha ka jingiakynduh u President rangbah ka FKJGP ia u SP, u SP u la kular ba un pynshitom ia kito ki pulit ba donkti ban leit kem ia ki 11 ngut ki dkhot ki ar seng.