Shillong:Ka tnat Wildlife jong ka Forest and Environment Department, ha ka jing iatrei lang bad ki pulit ka jylla lem bad ka Wildlife Crime Control Bureau (WCCB), ka la ioh kurup ia bun ki mrad kiba dang im bad nangta sa ka doh mrad ruh, ha ki ar jaka bapher.
Ha ka 19tarik mynta u bnai, ha ka jing ialam jong U I Arul Mathuram, Divisional Forest Officer, Khasi Hills Wildlife Division, ki la leit khynra ia ka iing jong U Victorious Masharing ha Khliehumstem, kaba ha Ri Bhoi district.
Ha katei ka jing talasi, la lap ia 44.64 kilo ka doh jong ka Chinese Pangolin, 4 tylli ki Chinese Pangolins kiba dang im bad 43 tylli ki Tokay Geckos. La lap ruh ia ka jingthew, kaba thew ia ka doh bad ia ki mrad.
Nalor U Victorious Masharing, ki don ruh sa 7ngut kiwei pat, ha katei ka iing bad kitei ki long U Pynshngianlang Sten, Fieldstar Lyngdoh, Banker Ronghang, Darwin Phangcho, Edison Teron, Klinson Bey bad U Siparlin Rani. La kem ia ki phra ngut bad la kurup noh ia ki tiar ki tar bad ki mrad, kiba don ha katei ka iing ba kynthup hynniew tylli ki mobile phone, T.25 hajar ka pisa bad nangta sa ki kali, kiba don ia ki number AS 025 -0127, ML-10 A -9330 bad ML 10 C 4056, ba la pynieng ha iing U Victorious Masharing.
La wan rah ia kitei kiba shah kem bad ki tiar, ki tar sha Shillong. La iathuh ba U Victorious Masharing, u dei uba trei ha Assam Rifles.
U Session Judge, Ri-Bhoi District, Nongpoh, ula bat ia kitei ki phra ngut ha ka jingpeit jong ka kashari, na ka bynta 7 sngi kynthih.
Ha ka 20tarik mynta u bnai, ka tnat Wildlife Wing jong ka Forest and Environment Department, ka ioh khubor, ba ki don kiba khaii ia ki bniah hati bad la ap ia ki ha Umling.
Ha ka por 9.30 mynmiet, la kem ia U Pyndap Wahlang bad U Last Sylliang bad la ioh kurup ia ar tylli ki bniat hati, kiba khia 3.3 kilo bad nangta sa kali maruti, kaba don ia u number ML 10 C 2505, na surok Patharkhmah-Umling. La kem ia kitei ki arngut bad la kurup ruh ia kali bad ki ar tylli ki mobile phone.
Phi don ban ong eiei?