Shillong: U myntri kam poh ing ka jylla u Ma Lakmen Rymbui, u ba dei ruh u myntri ka tnat khlaw mynta ka sngi u la ong ba ki la don 10 ngut kiba shah kem kiba donkti ban pyniap iaka dngiem (Asiatic Black Bear) kaba la duna jait hapoh ka pyrthei.
“Naka liang ka tnat Khlaw ka la ioh ban kem iaki ba donkti ban pyniap iaka dngiem bad mynta ka jing tohkit pyrshah iaki ka dang iaid shakhmat” la bynrap u Ma Lakmen Rymbui.
Na ka liang u Ma Lakmen Rymbui u la ong ba kat kum ka ain jong ka ‘Wildlife Protection Act 1972’ ka sorkar India ka batai ba kino kino kiba donkti ban pyniap ia ki mrad khlaw kin shah shet patok haduh 7 snem bad shah dain kuna haduh 25 hajar tyngka.
U bah Lakmen Rymbui u la ong ruh ba ki paidbah ki dei ban sngewthuh ba ki mrad ruh ki don bynta haka ka pyrthei namar kata ki paidbah kidei ban burom lang. U Ma Lakmen Rymbui u la kyntu ruh iaki paidbah ban pyntip sha ki bor ka ain lada lap ia kiba donkti ban dusmon iaki mrad khlaw ne ki dohum.
Phi don ban ong eiei?