Shah kem 1, ba thok T.18 lak, ha ka kam dewiong

Nongstoiñ, 29 Lber:
U wei u rangbah na ka shnong Lamavilla Shillong, u la ujor da ka ehajar ha thanat Nongstoin pyrshah ia u wei u briew u bala tip kyrteng kum u Wanlang Kharkrang na ka shnong Pyndenglawar Nongstoin, halor ka jingdon kti jong u ban thok bad shukor ia u tei u rangbah da ki phew lak.
Katkum ka tyllong khubor na ki pulit ka Nongstoin, la ong ba u tei u rangbah na Lamavilla ha ka 9 tarik Kyllalyngkot 2014, u la iakut da kaba iathoh jingiateh bad u bah Wanlang Kharkrang ba un shah ia u bah Wanlang Kharkrang, ba un leit kit ia u dewiong na ka par jong u tei u rangbah ha ha ka dor T 3100 shi ton.
Shuh shuh ka khubor na ki pulit ka iathuh ruh ba u tei u bah Kharkrang u la dep ruh ban siew lupa (Advance) 3 lak tyngka sha u tei u rangbah bad hadien ba u tei u bah Kharkrang u la dep ban kit lut plain ia u dewiong u ba la poi shaduh ka 700 metric ton kaba la kot ruh sha ka T. 21 lak 70 hajar tyngka bad ka pisa kaba sah sa kumba 18 lak 70 hajar, ki la iakut ban siew ar sien siew (two installment) haduh 6 bnai hynrei haduh mynta u tei u briew ym shym pat la lah satia ban siew.
Kumta haba u tei u rangbah u la iohi ba u tei u bah Kharkrang la leh bym patiaw ei ei hadien ba u la ai da ka jingthoh sha u, u tei u rangbah u la pyrshang biang ha ka sien kaba khatduh ban khot iakren bad u tei u bah Kharkrang ha kaba u la wan mih ban iakren bad ha katei ka jingiakren u tei u bah Kharkrang u la pan por ban siew ia katei ka pisa ba sah bad u tei u briew u la thoh ruh ia ka Promissory Note da ka mon sngewbha jong u kata ha ka 31/8/2016 bad u la buh ruh ia kapor kaba khatduh ha u bnai Naiwieng 2016.
Hynrei haduh ba la kut noh katei ka por ba u la buh hi ruh um shym pat la lah satia ban siew dep ia katei ka pisa ba sah bad haba u tei u rangbah u la pyrshang ban phun la bun bun sien hynrei utei u bah Kharkrang u la kyntait ban shim wat ia ka phun ruh.
Kumta na ka liang jong ki pulit ka Nongstoin hadien ba ki la ioh pdiang ia katei ka ehajar na u tei u rangbah na Lamavilla hynnin ka sngi ba ar jong ka taiew ki la ioh ban kem noh ia u tei u briew na ka shnong Siejlieh West Khasi Hills District, bad ki pulit kila register case ia u tei u briew bad ka jingtohkit ka dang iaid shakhmat.