Shillong: Ka Boxing Federation of India (BFI) ka lah jied ia U Bah Larry Kharpran Sun,Secretary jong ka Meghalaya Boxing Association(MBA) kum uwei na ki nong peit pyrman sha ka 18th Asian Games kaba lah iaid mynta shakhmat ha Palembang, Jakarta, Indonesia.
Ka Meghalaya Boxing Association(MBA) ka pynpaw ka jingsngew sarong halor ka shah jied jong u Bah Larry Kharpran Sun namar u dei uwei u nongpyniaid bad pynkiew ia ki jingialehkai iakura ha ka jylla bad ruh kum u Boxing Coach ba trei ha ka tnad ialehkai ka jylla. Ka jingshah jied jong u kan long shisha ka jingiohnong ia ka seng (MBA) bad ia ka jylla hi baroh kawei khamtam lei lei ba ka jylla ka buh ia ka thong ban pynlong ia ka National Games ha u snem 2022.
Ka MBA ka kyrmen ba hadien ka jingwan na katei ka jingleit, u Bah Larry Kharpran Sun un pashat ha ka rukom pyniaid ia ki lympung iakura bad kumjuh khamtam eh ia ki nongiakura ka jylla. Ka Executive Committee lyngba u President, Meghalaya Boxing Association (MBA) Bah Peter Lyngwi ki ai ka jingkhublei bad kitbok kitrwiang ia I Bah Larry Kharpran Sun.