Shah jied U bah Donevan, kum U Deputy Chairman ka KHADC

Shillong, 1 Lber:
U MDC ka Congress na Sohra Konsti twensi u bah Donevan Kharwanlang mynta ka sngi u la shah jied kum u Deputy Chairman ka KHADC khlem don nong iakhun pyrshah. U bah Donevan u la leit ban shimti ia ka kam Dy. Chairman da kaba iehnoh ia ka kam EM ha KHADC, u la bat kum u EM jong ka tnad Land, Mines and Minerals shuwa ba un shimti kum u Deputy Chairman. Hadien ba la pynbna ia katei ka jingjop u khlem don nongiakhun pyrshah kaba la pynbna da U Chairman ka KHADC u bah Mansturdy Nongrem la leit ban synran ia u bah Donevan sha ka shuki ba u dei ban shong mynta da u CEM ka KHADC u bah Pynshngaiñ N Syiem bad u EM u bah Neil Antonio War.
Hadien ka jingshah jied jong u ki MDC ka PDF ki la ai kren ai khublei ia ka jinglen lade jong u na bynta ka bha ka miat jong ka Council da kaba iehnoh ia ka kam EM ban leit sha ka kam Dy.Chairman kaba la sah thylli la katto katne bnai mynta bad ki la ai khublei ruh ia ka jingkloi jong u ban leit shimti ia katei ka kam kaba baroh ki EM ki kynran dien.
U CEM ka KHADC haba ai jingkren u la ong ba ka jingleit u bah Donevan kam dei tang ba ka myntoi ba u iarap ia ka kam u chairman bad ka Legislative hynrei kan pynkhlaiñ ruh ia ka rukom treikam ka Council. U bah P.T Sawkmie Dy.CEM ka KHADC u la ong ba u bah Donevan u dei u Dy.Chairman uba lai jong ka KHADC ha kane ka samoi treikam kaba mynta. Katba u bah Adelbert Nongrum pat u la ong ba u bah Donevan u la pynsah kynmaw ha KHADC da kaba iehnoh ia ka kam EM hynrei ban leit kum u Dy.Chairman.
Haba pynpaw ia ka jingkmen jong u ban leit sha ka shuki Dy.Chairman u bah Donevan u la ong “Nga kmen ba ha kine ki ar snem ba la dep nga la mad lut ha ka jinglong MDC, nga la don ha ka liang pyrshah, nga la long EM bad mynta nga long kum u Dy.Chairman, u la pan ka jingkyrshan jong baroh khnang ban pynthikna kumno ban pyniaid ia ka Council.